Փաշինյան. Այս ընտրությունները ցույց տվեցին, որ մեր ժողովուրդը կարողանում է թացը չորից տարբերել
«Ավելի լավ է գետինը մտնենք, քան լցոնումներ անենք»,-ուղիղ եթերում հայտարարեց Նյու Յորքում գտնվող վարչապետ Նիկոլ Փաշինյանը՝ անդրադառնալով մարդկանց այն մտահոգություններին, որ իշխանությունները մի օր կարող են դիմել վարչական ռեսուրսի օգնությանը։
Նա շնորհավորեց Հայկ Մարությանին, մաղթեց նրան ժողովրդահաճո ու արդյունավետ գործունեություն քաղաքապետի պաշտոնում, ավագանու անդամներին էլ ցանկացավ, որ արդարացնեն քաղաքացիների սպասելիքները, շնորհավորեց Երևանի ավագանու կազմում ընդգրկվելիք ԲՀԿ-ին ու «Լույս» դաշինիքին։ Նա բարձր գնահատեց այն, որ հաղթող թեկնածուին շնորհավորել են ու հայտարարություն տարածել ընտրություններին մասնակից քաղաքական ուժերը, նրանց առաջադրած թեկնածուները։ Շնորհակալություն հայտնեց դիտորդներին, վստահված անձանց, ոստիկանությանը։
«Մենք շատ ուշադիր պետք է հետևենք դիտորդների առաջարկություններին, նկատառումներին, որովհետև մեր ընտրական համակարգը իսկապես հասցնենք բարձր մակարդակի»,-նշեց վարչապետը։
Անդրադառնալով ընտրությունների մասնակցության պասիվության վերաբերյալ մեկնաբանություններին, Փաշինյանն ասաց. «Հիմա շատերը փորձում են ասել, երևանցիներից շատերը չեն մասնակցել ընտրություններին ու դրանից անում են քաղաքական հետևություններ։ Մեղմ ասած, այդ փաստարկները ծիծաղելի են»։
Նա նշեց, որ նախորդ տարիներին քաղաքացիներին ընտրելու տարել են պարտադրանքով, բացի այդ էլ ընտրական ցուցակները չեն համապատասխանում իրականությանը, օրինակ մարդիկ կան, որ 20 տարուց ավելի Հայաստանում չեն, սակայն նրանց անունը ներառված է ցուցակում։
«Նախորդ տարի Երևանի ավագանու ընտրություններին ավելի քիչ մարդ է մասնակցել այն պարագյում, երբ գազելներով, ավտոբուսներով, լծակներով, կաշառքով, ըստ էության հարկադրաբար, բերման են ենթարկվել ընտրատեղամաս»,-ասաց կառավարության ղեկավարը՝ շնորհակալություն հայտնելով, որ ժողոուրդն իրեն մանդատ տվեց։
Փաշինյանը հիշեցրեց, որ Երևանի վերադառնալու պես խորհրդարանական ու ոչ խորհրդարանական ուժերի հրավիրելու է խորհրդակցությունների, որպեսզի քննարկեն արտահերթ ընտրությունների անցկացման ժամկետները։
«Այս ընտրությունները շատ կարևոր էին, որ դուք կարողացաք որոշել, ով պետք է լինի քաղաքական դաշտում, ով՝ ոչ։ Հիմա նույնիսկ ասում են, որ իշխանությունը բարձր վարկանիշ ունի, ինչ կլինի, եթե այդ թվերը փոխվեն ու իշխանությունը ցածր վարկանիշ ունենա։ Պատասխանը շատ պարզ է, երբ իշխանության վարկանիշը ցածր լինի, նա այլևս իշխանություն չպետք էլինի։ Եկեք մոռանանք, որ Հայաստանում ինչ-որ մեկը լցոնումներ է անելու, վարչական ռեսուրս է օգտագործելու ժողովրդից իշխանությունը խլելու համար, իշխանությունն անվերադարձ վերադարձվել է ժողովրդին։ Ավելի լավ է գետինը մտնենք, քան լցոնումներ անենք, վարչական ռեսուրս ու կրիմինալին օգտագործենք։ Այս ընտրությունը ցույց տվեց, որ ժողովուրդը թացը չորից տարբերում է, ցույց տվեց, որ Հայաստանում քաղաքական պրոցեսներն ամբողջությամբ գտնվում են ՀՀ քաղաքացու վերահսկողության ներքո»,-հայտարարեց Փաշինյանը։
Լրահոս
Տեսանյութեր
Կառավարության համար ՀՀ ո՞ր քաղաքացիներն են համարվելու իրական Հայաստանի քաղաքացիներ. Ռուստամյան
