Ձեր վստահելի աղբյուրը

«Կարող ենք փաստել, որ հետահեղափոխական շրջանում և Հայաստանի անկախության վերջին տարիներին այս ընտրությունները բացառիկ էին իրենց թափանցիկությամբ, արդարությամբ, ժողովուրդը կարողացավ ազատ արտահայտել իր կամքը»,- «Ամփոփելով Երևանի ավագանու արտահերթ ընտրությունները. ինչպե՞ս են գնահատում քաղաքական ուժերը քվեարկությունը» թեմայով» քննարկմանն ասաց Երևանի ավագանու «Լույս» դաշինքի թեկնածու Անի Սամսոնյանը՝ շնորհավորելով «Իմ քայլը» դաշինքին ընտրություններում հաղթանակի կապակցությամբ, նաև երևանցիներին, ովքեր գնացել և իրենց մեկ քվեով հաստատել են իրենց իշխանությունը Երևանում։

Նա նշեց, որ  երեկ կայացած արտահերթ ընտրությունները հեղափոխության հաղթանակի ևս մեկ արձանագրումն էր, ինչը շատ կարևոր է ոչ միայն Երևանի, այլ ողջ Հայաստանի համար։

Ա. Սամսոնյանի խոսքով, երեկ ողջ օրվա ընթացքում ընտրախախտումների մասին ահազանգեր գրեթե չեն ստացել։

«Եղել են, իհարկե, մի քանի տեղամասերում փոքր խախտումներ, բայց կարդացի, որ դրանք եղել են տեխնիկական պատճառներով։ Եղել են ուղղորդումներ։ Գլխավոր խնդիրն այն էր, որ քաղաքացիները նկարում էին իրենց քվեաթերթիկները և հրապարակում, ինչն անթույլատրելի է»,- ասաց «Լույս» դաշինքի ավագանու թեկնածուն։

«Իմ քայլը» դաշինքից Վահան Կոստանյանը  նշեց, որ օրվա ընթացում եղել են որոշակի ընտրախախտումներ, որոնց մի մասը  տեխնիկական էին, մի մասը կապված էին հանձնաժողովի անդամների, նախագահների, քարտուղարների աշխատանքի հետ, ովքեր փորձել են խոչընդոտել իրենց վստահված անձերի, հանձնաժողովի անդամների գործունեությունը, կոծկել լուսանկարահանման դեպքեր և այլն։

«Բայց, ըստ էության, պետք է արձանագրել, որ Հայաստանում նման որակի ընտրություններ երկար տարիներ չենք ունեցել»,- ասաց նա։

Ինչ վերաբերում է իրենց ուժի՝ ընտրություններում 81 տոկոս ձայն հավաքելուն, նա նշեց, որ իրենց դաշինքը հենց հեղափոխական ցուցակն էր, ապա փաստեց, որ Հայաստանում հեղափոխությունը շարունակվում է։

«Հեղափոխությունը մտավ Երևանի քաղաքապետարան, Երևանի բնակիչները նաև կամարտահայտություն ցույց տվեցին, որ  Հայաստանում անհրաժեշտ են արտահերթ խորհրդարանական ընտրություններ»,- ասաց Վահան Կոստանյանը։

Նա նշեց, որ քաղաքապետարանում կադրային ջարդ տեղի չի ունենալու անկախ կուսակցական պատկանելիությունից. «Այն մարդիկ, ովքեր պրոֆեսիոնալ են, իրենց տեղում են, մաքուր են,  շարունակելու են իրենց աշխատանքը, մյուսները, կարծում եմ, հասկանալով Երևանի քաղաքապետարանում ստեղծված նոր իրողությունները, իրենք կհեռանան»։

Քննարկմանը ներկա Հայ Յեղափոխական Դաշնակցություն կուսակցությունից Դավիթ Հակոբյանը նույնպես փաստեց, որ 1991 թվականից հետո Հայաստանում բացառիկ արդար, թափանցիկ ընտրություններ տեղի ունենցան, քաղաքացիները  հնարավորություն ունեցան իրենց կամքը  արտահայատել և իրենց ձայները տեղ հասցնել։ Միաժամանակ նա նշեց, որ նախընտրական շրջանը ներկայացվում էր հնի ու նորի պայքար։

«Բայց, այնուամենայնիվ, պետք  է փաստենք, որ տեղի ունեցան արդար, ազատ ընտրություններ,  հույս ունենք, որ այս ընտրություններից հետո Հայաստանում կձևավորվի քաղաքական նոր ընտրապայքար։ Ժամանակն է, որ շարունակական հեղափոխությունը տեղափոխվի նաև պետական ատյաններ»,- ասաց նա։

«Բարգավաճ Հայաստան» կուսակցությունից ավագանու թեկնածու Արման Աբովյանը նախ ասաց, որ տարածել են հայտարարություն, որտեղ ևս միացել են շնորհավորանքներին, ինչպես խոսք էին տվել։

«Իհարկե, այս ընտրությունները բոլոր առումներով գրեթե ամենամաքուր ընտրություններն էին, իհարկե, հաշվի առնելով,  որ նախընտրական փուլում փորձեր էին ձեռնարկվում որոշակի տեխնոլոգիաներով, սև PR-ով տարբեր ուժերի հակամարտությունը, սակայն ես համարում եմ դա բնականոն պրոցես, որը, իհարկե, ժամանակի ընթացքում կշտկվի»,- ասաց   Ա. Աբովյանը։

Երևանի ավագանու «Ժառանգություն» կուսակցության թեկնածու Անդրանիկ Գրիգորյանի գնահատմամբ, նախօրեին կայացած ընտրությունները 1991 թվականից մինչ օրս Հայաստանի ամենալեգիտիմ ընտրություններն էին,  «Ժառանագություն» կուսակցությունը քվեարկություն արդյունքներն ընդունել է ի գիտություն։

Շնորհավորելով «Իմ քայլը» դաշինքի ներկայացուցիչներին՝ նա ասաց. «Ուզում եմ ներքին  վստահություն ունենալ, որ նրանց ծրագրերը ի կատար կածվեն հանուն Հայաստանի և երևանցու շահի»,- ասաց Ա. Գրիգորյանը։