Ձեր վստահելի աղբյուրը

Հայտնի դերասան, ռեժիսոր, ԽՍՀՄ ժողովրդական արտիստ 82-ամյա Արմեն Ջիգարխանյանը նախօրեին չի ներկայացել դատարան, ցուցմունք չի տվել անձնական կյանքի գաղտնիության իրավունքի խախտման  գործով։ Այս գործով մեղադրանք է առաջադրված  Ջիգարխանյանի նախկին կնոջը՝ Վիտալինա Ցիմբալյուկ- Ռոմանովսկայային։

«Սպասում ենք տուժողին և վկաներին։ Արմեն Բորիսովիչը չի ցանկանում գալ դատարան։ Նա ամեն անգամ դատավարության ընթացքում հիվանդանում է»,- Վեստի.ռու-ի հաղորդմամբ իր դժգոհությունն է հայտնել Ցիմբալյուկ-Ռոմանովսկայայի փաստաբան Լարիսա Շիրոկովան։

Նա նշել է, որ եթե խախտվել է մարդու անձնական կյանքը, ապա նա ինքը պետք է պարզաբանի, թե այդ խախտումն ինչպես է արտահայտվել։

Ա. Ջիգարխանյանի փաստաբանն ասել է, որ դերասանը  ընթացիկ ստուգումներն է անցնում, նա իրեն լավ է զգում։ Բայց դերասանը չի կարող գնալ դատական նիստերին, քանի որ դա իր համար զգացմունքային, ֆիզիկական և  բարոյական փորձություն է։

Քննության վարկածով, Վիտալինա Ցիմբալյուկ- Ռոմանովսկայան թատրոնի աշխատասենյակներից մեկում տեղադրել էր տեսախցիկ՝ գաղտնի նկարահանելու համար։ Ավելի ուշ կադրերը ցուցադրվել են հեռուստաալիքներից մեկով։ Ցիմբալյուկ- Ռոմանովսկայան չի ընդունում իր նկատմամբ առաջադրված՝ անձնական կյանքի գաղտնիության իրավունքի խախտման մեղադրանքը։

Արմեն Ջիգարխանյանի և նրա կնոջ շուրջ սկանդալը ծագել էր 2017 թվականի աշնանն այն բանից հետո, երբ հայտնի դերասանը մեղադրել էր իր կնոջը խաբեության մեջ և հայտարարել նրանից  բաժանվելու մասին։ Պաշտոնապես նրանք ամուսնալուծվել էին 2017 թ. նոյեմբերի 27-ին։