Ձեր վստահելի աղբյուրը

Մոսկվայի Բասմաննի դատարանը սեպտեմբերի 27-ին կքննարկի հոր սպանության մեջ մեղադրվող Խաչատուրյան քույրերից կրտսերի ազատ արձակման միջնորդությունը: Ռիա նովոստիի հաղորդմամբ, այս մասին հայտնել է միջազգային իրավապաշտպան «Ագորա» կազմակերպության ղեկավար Պավել Չիկովը: Հինգշաբթի կքննարկվի նաև մյուս երկու քույրերի՝ Քրիստինայի և Անգելինայի ազատ արձակման մասին միջնորդությունը:

Այսօր ավելի վաղ պարզ էր դարձել, որ քննչական մարմինները միջնորդել էին դատարանին քույրերի խափանման միջոց կալանքը փոխելու մասին: Առաջարկվում է քույրերին արգելել որոշակի գործողություններ կատարել, քննությունը չի պարզաբանել, թե կոնկրետ ինչ գործողությունների մասին է խոսքը:

Որոշակի գործողությունների արգելքը խափանման նոր միջոց է, որ վերջերս ընդգրկվել է Քրեական դատավարության օրենսգիրքում։

Հիշեցնենք, որ ՌԴ քննչական կոմիտեն հայտնել էր, որ հուլիսի 27-ին Ալտուֆևյան մայրուղու բազմահարկերից մեկի մուտքում հայտնաբերվել է  57-ամյա տղամարդու մարմին՝ պարանոցի և կրծքավանդակի շրջանում դանակի բազմաթիվ հարվածներով։  ՔԿ  տվյալներով, նրան դանակով հարվածներ են հասցրել երեք աղջիկները։ Նրանց  մեղադրանք է առաջադրված։  Աղջիկները հաստատում են, որ տղամարդը, գտնվելով թմրամիջոցի ազդեցության տակ, առաջինն է հարձակվել  նրանց վրա դանակով, նրանք էլ պաշտպանվել են։ Հարցաննությանն աղջիկները խոստովանել են մեղքն ու պարզաբանել, որ իրենց  և իրենց հոր միջև թշնամական հարաբերություններ էին հաստատվել այն պատճառով, որ նա երկար ժամանակ իրենց բարոյական տառապանքներ է պատճառել։Խաչատուրյան քույրերը  օգոստոսի 2-ից կալանավորված են։

Փորձագետները Քրիստինային և Անգելինային ճանաչվել էին մեղսունակ։ Խաչատուրյան քույրերից կրտսերը՝ 17-ամյա Մարիան, հոր սպանության պահին անմեղսունակ է ճանաչվել, նրան տեղափոխել էին Մոսկվայի «Բուտիրկա» բանտի հոգեբուժական բաժանմունք։