Ձեր վստահելի աղբյուրը

Նյու Յորքում ՄԱԿ-ի գլխավոր Ասամբլեայի 73-րդ նստաշրջանի շրջանակում զրույց է կայացել Ռուսաստանի և Հայաստանի արտաքին գործերի նախարարներ Սերգեյ Լավրովի և Զոհրաբ Մնացականյանի միջև։

ՌԴ ԱԳՆ պաշտոնական էջում հրապարակված տեղեկատվության համաձայն,  քննարկվել են երկկողմ հարաբերությունների, տարածաշրջանային օրակարգի  վերաբերյալ հարցեր։  Հատուկ ուշադրություն  է դարձվել միջազգային համաժողովներում ռուս-հայկական համագործակցության հարցերին։

Ավելի վաղ Հայաստանի ԱԳ նախարարությունից էլ հայտնել են, որ ԱԳ նախարար Զոհրաբ Մնացականյանը Նյու Յորքում մասնակցել է ՀԱՊԿ անդամ պետությունների արտաքին գործերի նախարարների հանդիպմանը։

ԱԳ նախարարները քննարկել են ՄԱԿ Գլխավոր ասամբլեայի 73-րդ նստաշրջանի շրջանակներում փոխգործակցությանն առնչվող հարցեր, ներկայացրել են ՄԱԿ-ի շրջանակներում իրենց առաջնահերթությունները, անդրադարձ  է կատարվել ՄԱԿ-ի հարթակում ՀԱՊԿ անդամ-պետությունների նախաձեռնություններին ու դրանց փոխադարձ սատարմանը, մտքեր են փոխանակել ՀԱՊԿ ընթացիկ աշխատանքների շուրջ:

Հանդիպմանը մտքեր են փոխանակվել նաև ՀԱՊԿ գլխավոր քարտուղարի փոփոխման շրջանակներում ծավալվող գործընթացի շուրջ:

ՀԱՊԿ անդամ պետությունների նախարարների ուշադրությանն են ներկայացվել նոյեմբերին Աստանայում կայանալիք Հավաքական անվտանգության խորհրդի ու կանոնադրական մարմինների նիստերին, ինչպես նաև կազմակերպության աշխատանքային օրակարգին առնչվող հարցեր:

Հանդիպման ավարտին ԱԳ նախարարները ստորագրել են «Տարածաշրջանային կազմակերպությունների հետ ՀԱՊԿ համագործակցության ակտիվացման», «Աֆղանստանում իրադրության, երկրի հյուսիսային նահանգներում ԻԼԻՊ-ի դիրքերի ամրապնդման և Աֆղանստանի Իսլամական Հանրապետությունից թմրամիջոցների տարածման վտանգի աճի», «Մերձավոր Արևելքում և Հյուսիսային Աֆրիկայում իրադրության կայունացմանն ուղղված ջանքերի» վերաբերյալ հայտարարությունները։