Ձեր վստահելի աղբյուրը

ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի այսօր կազմակերպած խորհրդարանական լսումների ժամանակ ԱԺ պատգամավոր Խոսրով Հարությունյանի և բնապահպանական ՀԿ-ների ներկայացուցիչների միջև վիճաբանություն ծավալվեց։

«Այսքան տարի հորդորում ենք դադարեցնել Սևանից ջրառը, իսկ դուք հորդորները հաշվի չեք առնում։ Դուք նույնն եք մնացել, ամեն ինչ նույնն է մնացել, ոչինչ չի փոխվել»,- պատգամավորին ասաց բնապահպան Սիլվա Ադամյանը։

Այլ ՀԿ-ների ներկայացուցիչներ էլ նախկին իշխանություններին մեղադրեցին տարիներով Սևանի հնարավորությունները շահագործելու մեջ։

Խոսրով Հարությունյանը փորձեց հակափաստարկներ բերել, սակայն  այնուհետ արագորեն դուրս եկավ դահլիճ։

Քննարկումը շարունակվեց։

Սևանա լճի պահպանման փորձագիտական հանձնաժողովի նախագահ Յուրի Ջավադյանն իր հերթին նշեց, որ Սևանի ջրային ռեսուրսների ներկա պաշարները հաշվի առնելով՝ կարելի է պնդել, որ մեծ ռիսկի տակ են Արարատյան դաշտի 31 գյուղերի ոռոգման, խմելու ջրի, ինչպես նաև ատոմակայանի հովացման հարցերը։ 

«Շրջակայքի 17 հազար հա հողեր ճահճացման և կրկնակի աղակալման վտանգի տակ են։ Սևանը նուրբ օրգանիզմ է։ Ջրի ծավալներն այս տարիների ընթացքում 58 միլիարդ խորանարդ մետրից իջել են 38 միլիարդ խորանարդ մետրի»,- ասաց բանախոսը։

Բնապահպանական ՀԿ-ների ներկայացուցիչները վերջինիցս պահանջեցին թվարկել բոլոր այն պաշտոնյաների անունները, որոնք դրական եզրակացություն են տվել Ամուլսարի ծրագրին, որն էլ ամենաուղիղ բացասական ազդեցությունն է ունեցել լճի էկոլոգիական վիճակի վատթարացման վրա։

Յուրի Ջավադյանը խուսափեց կոնկրետ աննուներ նշել, միայն հիշեցրեց, որ 2014 թվականին հանքավայրը շահագործելու դրական եզրակացություն տվել է ՀՀ նախագահին առընթեր Սևանա լճի հիմնահարցերի հանձնաժողովի նախկին նախագահ Վլադիմիր Մովսիսյանը։

«Էկոլուր» տեղեկատվական ՀԿ ղեկավար, բնապահպան Ինգա Զարաֆյանը հակադարձեց բանախոսին՝ նշելով, որ վերոնշյալ անձը մշտապես դեմ է եղել Ամուլսարի ոսկու հանքի շահագործմանը, իրենք ունեն նաև գրավոր հավաստիացումները։

«Սևանը կանգնած է կատաստրոֆիկ վիճակի առաջ։ Մենք լիճը պետք է փրկենք հիմա, հենց հիմա՝ ջրի մակարդակը բարձրացնելոու ճանապարհով, այնինչ անընդհատ լրացուցիչ ջրառ է իրականացվում»,- ասաց նա։

«Հանուն կայուն մարդկային զարգացման» ասոցիացիայի նախագահ, բնապահպան Կարինե Դանիելյանն իր հերթին նկատեց, որ  լճի ջրի ամենացածր մակարդակը գրանցվել է 2001-2002 թվականներին։ «Մեր բարձրացրած աղմուկից հետո ջրի մակարդակը սկսեց բարձրանալ։ Դեռ 20 սանտիմետր էլ պետք է բարձրացվի։ Այնինչ մենք արհեստականորեն թույլ չենք տալիս, որ մակարդակը բարձրանա։ Մամուլում գրում են, որ դրա պատճառն օլիգարխների՝ ափին գտնվող վիլլաներն են։ Մինչդեռ երբ Սևանի ջրի մակարդակը բարձրացնում ենք, մեկ տարվա ընթացքում լիճը դրականորեն է արձագանքում, սկսում է ինքնամաքրման մեխանիզմներ իրականացնել։ Միաժամանակ, ջրի մակարդակը բարձրացնելը բավական դժվար գործ է, սակայն բոլոր մնացած խնդիրները պետք է ստորադասել այդ նպատակին»,- ասաց Դանիելյանը։