Ձեր վստահելի աղբյուրը

«Սևանը ոչ միայն տնտեսական, այլև էկոլոգիական նշանակություն ունի ինչպես Հայաստանի, այնպես էլ տարածաշրջանի համար»,- ԱԺ տարածքային կառավարման, տեղական ինքնակառավարման, գյուղատնտսությա և բնապահպանության հարցերի մշտական հանձնաժողովի կազմակերպած խորհրդարանական լսումների ժամանակ ասաց հանձնաժողովի նախագահ Վարդևան Գրիգորյանը։

ՀՀ բնապահպանության նախարար Էրիկ Գրիգորյանն իր հերթին նշեց, որ այս պահի դրությամբ Սևանա լճի մակարդակը անցած տարվա համեմատ + 3 սմ է։

«Բնապահպանության նախարարության նախաձեռնությամբ մեր մաքսային մարմինները երեկանից արգելել են 50 մմ ցածր ձկնորսական ցանցերի ներմուծումը Հայաստան։ Սա շատ կարևոր կետ եմ համարում, քանի որ ձկան վերականգնման որոշ փուլերում չվերահսկվող որսը բերում է ծավալների անկման»,- ասաց նա։

Անդրադառնալով ամռանը լճում կապտականաչ ջրիմուռների ակտիվ աճին՝ նախարարը նշեց, որ իրենք ամենօրյա ռեժիմով տիեզերական պատկերների միջոցով հետևել են ջրիմուռների աճին։ Բանախոսը միաժամանակ շեշտեց, որ եթե անցած տարի լճի ջրի թափանցիկությունը հասնում էր 14 մետրի, ապա այս տարի, ջրիմուռների աճով պայմանավորված, թափանցիկության մակարդակը իջել էր 40-50 սմ։

«Սա բարձր ջերմաստիճանի, գետային հոսող ջրերի պակասի, լիճ թափվող մեծածավալ կեղտաջրերի հետևանք էր։ Ընդհանուր առմամբ, լճի ջրում զգալիորեն ավելացել է նաև ֆոսֆորի պարունակությունը, ինչը խիստ բացասական է։ Իրավիճակը շտկելու համար պետք է սահմանափակել կեղտաջրերի մուտքը Սևանա լիճ, բացի այդ, լճի մոտակայքում տեղակայված կառույցների տնտեսվարողները պետք  է նախատեսեն, որ առանց կեղտաջրերի մաքրման համակարգի չեն կարող իրենց գործունեությունը շարունակել»,- շեշտեց Էրիկ Գրիգորյանը՝ տեղեկացնելով, որ նախատեսվում են լճի ափին տեղակայված որոշ շինությունների քանդման աշխատանքներ։

Նա միաժամանակ ընդգծեց, որ լճից ավելի մեծ ծավալներով ջրառը իրենց պլանների մեջ չի մտնում։ «40 միլիոնի ջրառի անհրաժեշտությունն առաջացավ Արարատյան դաշտի ոռոգման պատճառով»,- հիշեցրեց նախարարը։

«Ծառուկյան խմբակցության» պատգամավոր Միքայել Մանուկյանը հետաքրքրվեց՝ արդյոք կա՞ն խանգարող հագամանքներ, որոնք խոչընդոտում են Սևանի հետ կապված խնդիրների լուծմանը։ Նախարարը պատասխանեց, որ այդպիսի որևէ հանգամանք գոյություն չունի։ Նա միաժամանակ նշեց, որ իրենք լճի խնդիրների լուծման հարցում ակնկալում են ԱԺ աջակցությունը։

Նույն խմբակցության պատգամավոր Սերգեյ Բագրատյանն էլ  հարց ուղղեց՝ արդյոք նախատեսվո՞ւմ է նոր ջրամբարների կառուցում։ Էրիկ Գրիգորյանը պատասխանեց, որ ջրամաբարներ կառուցելուց զատ՝ կարևոր է նաև ջրային ռեսուրսները ճիշտ կառավարելը։ «Մենք ունենք մի քանի առաջարկներ։ Տարբերակներից մեկը կարող է լինել ջրամաբարների կառուցման համար տարիֆ սահմանելը, որը կբերի այդ ոլորտում ներդրումների։ Սակայն այս մասով մեծ ակնկալիքներ չունեմ»,-ասաց նա։