Ձեր վստահելի աղբյուրը

2018թ.-ի հոկտեմբերի 11-12-ին Հայաստանում տեղի կունենա Ֆրանկոֆանիայի գագաթնաժողովը, որի ժամանակ Հայաստանը կհյուրընկալի 84 երկրների պատվիրակությունների։ Բացի քաղաքական օրակարգից՝ այն նաև հագեցած է լինելու մշակութային, տնտեսական և մի շարք այլ հարակից միջոցառումներով։ Ֆրանկոֆոնիայի գագաթնաժողովի շրջանակներում Երևանի կենտրոնում հոկտեմբերի 7-ից 12-ը կգործի «Ֆրանկոֆոնիայի ավան», որում 20 տաղավարների մեջ իր ներկայությունը կունենա Ֆրանսիան, ի թիվս Բելգիայի, Շվեյցարիայի, Աֆրիկյան երկրների։

Ֆրանսերեն լեզուն ոչ միայն կիսվելու ու օգտագործելու համար է, այլ նաև ստեղծագործելու ու հաջողության հասնելու՝ «Հնարավորությունների ֆրանսերեն», ինչպես բնորոշում է Ֆրանսիայի նախագահ Էմանուել Մակրոնը։

Ֆրանսիայի տաղավարի պատասխանատու Պատրիկ Դեվոտուրը նշեց, որ տաղավարը ներկայացվելու է 150քմ տարածքում, որտեղ համատեղվել է բազմաթից տնտեսական, մշակութային, կրթական միջոցառումներ, 3D անիմացիաներ։

Ֆրանսիայի տաղավարներում լինելու են ծրագրեր՝ գործարարություն և զարգացում, թվային ոլորտ, մեդիաներ և մշակույթ, արհեստներ, գիտելիք և լեզուներ թեմաներով։

Տաղավարներում կիրականացվի բլոգերների վերապատրաստում, վարսահարդարման ցուցադրություն, խոհարարական մրցույթ, ֆրանսերենի դասընթացներ սկսնակների համար ու վերապատրաստում՝ դասավանդողների համար։

Ֆրանսերենի շուրջ կհամախմբվեն ֆրանսիական TV5 հեռուստաընկերությունը, RFI ռադիոկայանը, ֆրանսիական ինստիտուտը։

Միջոցառումների շարքում է  նաև «Caravan des dix mots» միջոցառումը՝ իր հսկա խամաճիկներով, երգին, պարին ու թատրոնին նվիրված սեմինարներով, ֆրանսիացիների սիրելի պետանկ խաղով։
Ֆրանսիայի տաղավարները, ինչպես նշվեց, լիովին համապատասխանում է գագաթնաժողովի՝ «Ապրելու ու միասին ստեղծելու» ֆրանկոֆոն ավանի կարգախոսին։