Ձեր վստահելի աղբյուրը

«Հայ Փոքրիկ Երգիչները» Արամի 23 հասցեում գտնվող պատմամշակութային հուշարձան-շենքը փրկելու համար այսօր կրկին ակցիա են իրականացնում՝ «Փրկե՛նք Արամի 23-ը, փայփայե՛նք հին Երևանի վերջին պատառիկն ու Նոր Հայաստան ունենալու մեր հույսը»։

Փլուզման եզրին է պատմամշակութային արժեք հանդիսացող, հին Երևանի հատուկենտ վկաներից մեկը՝ Արամի 23 հասցեում գտնվող «Հայ փոքրիկ երգիչներ» միջազգային ասոցիացիա ՀԿ-ին պատկանող պատմամշակութային հուշարձան-շենքը, որն ընդգրկված է «Երևան քաղաքի պատմության և մշակույթի անշարժ հուշարձանների պետական ցուցակում ` որպես տեղական նշանակության հուշարձան (1.6.206.3 ցուցիչով, բնակելի տուն՝ Զարմայր Անդրեասյանի):

«Այո, մենք այստեղ մեր փորձերն ենք անում,  բայց խնդիրը դա չէ, հուսանք՝ մի տեղ կգտենք մեր փորձերի համար։ Մենք խոսում ենք մի քանի պատմական հուշարձանի մասին, որ այս տարածքում են մնացել։ Մեր շենքի պատն ամեն օր կարող է փլվել»,- լրագրողների հետ զրույցում ասաց երգչախմբի գեղարվեստական ղեկավար Տիգրան Հեքեքյանը։

Հիշեցնենք, որ երեկ ՀՀ մշակույթի նախարարությունը հայտարարություն էր տարածել «Հին Երևան» ծրագրի շրջանակում իրականացված հողային և շինարարական աշխատանքների հետևանքով Արամի 23 հասցեում գտնվող հուշարձան-շենքի պահպանության վերաբերյալ՝ տեղեկացնելով, որ  պայմանավորվածություն է ձեռք բերվել հոկտեմբերի 1-ին ՀՀ մշակույթի նախարարությանը ներկայացնել հուշարձանի անխաթարությունը պահպանելու նախագիծ (այժմ կատարվում է հուշարձան-շենքի չափագրություն, որի հիման վրա կազմվելու է նախագծային առաջարկ):

«Հին Երևան թաղամաս» ֆեյսբուքյան էջում նշված է. «Արամի 23 հասցեում գտնվող հուշարձանի ներկա վիճակը հետևանք է այն բանի, որ շենքի իրացման հարցերը մինչ օրս դեռ չեն լուծվել:

Շենքի հարևանությամբ՝ Քոչինյան փողոցի ներքևի ստորգետնյա տարածքում՝ Հին Երևան թաղամասի հատվածում՝ -2 նիշի վրա, պետք է տեղադրվի էլեկտրական ենթակայան, որը կսնուցի ամբողջ Հին Երևան թաղամասը և հարևանությամբ գտնվող շենքերը: Մինչ այս էլ ենթակայանը Արամի 23 հասցեում գտնվող շենքի պատին կից էր, որը վտանգավոր էր և դրա արագ լուծման վերաբերյալ հարց էր բարձրացվել: Ենթակայանը տեղափոխելու համար փոսորակ է փորվել, բայց մինչ այսօր ներդրողի և սեփականատիրոջ միջև իրացման հետ կապված պայմանագիր չի կնքվել, ինչն էլ խոչընդոտում է շենքի ամրակայման աշխատանքներն իրականացնելուն:

Տվյալ պահին հուշարձանի կողային պատը ճեղք է տվել շենքի հիմնական կոնստրուկցիայից, քանի որ այն կոնստրուկտիվ տեսանկյունից կապված չէր կողքի պատի հետ, որը փոսորակի փորելու ժամանակ իրականացված հարվածներից վնասվել էր: Այսօր արդեն ամրակայման աշխատանքները հետաձգել հնարավոր չէ: Նախագիծը պատրաստ է, մյուս շաբաթ կսկսվեն ամրակայման աշխատանքները»: