Ձեր վստահելի աղբյուրը

ԱԺ պետաիրավական և մարդու իրավունքների պաշտպանության հարցերի մշտական հանձնաժողովում այսօր քննարկման էր ներկայացվել «Ազգային ժողովի կանոնակարգ» ՀՀ սահմանադրական օրենքում փոփոխություն կատարելու մասին» օրենքի նախագիծը: Նշենք, որ նախագծի հեղինակը ԱԺ փոխնախագահ Արփինե Հովհաննիսյանն է:

Հանձնաժողովի նախագահ Գևորգ Կոստանյանն անդրադարձ կատարեց ԱԺ քննիչ հանձնաժողովի նիստի քննարկումների ընթացքում պատգամավոր Գևորգ Պետրոսյանի բարձրացրած այն հարցին, թե պաշտոնատար անձը պարտավորություն ունի՞ ներկայանալ քննիչ հանձնաժողովի նիստերին, անգամ եթե թողնում է պաշտոնը։

Հիշեցնենք, որ ԱԺ «Ծառուկյան խմբակցության պատգամավոր Գևորգ Պետրոսյանն ավելի վաղ չէր բացառել, որ պաշտոնյան կարող է կարևոր տեղեկություն տալու ցանկություն չունենալ և ինքնակամ հրաժարվել պաշտոնից։

Նախագծի հեղինակ Արփինե Հովհաննիսյանն իր հերթին նկատեց՝ փոփոխություններն առաջարկվել են այն բանի համար, որպեսզի ԱԺ քննիչ հանձնաժողովի կողմից վարույթ սկսելու պահից պաշտոնավորումը դադարեցրած անձը շարունակի պարտավորությունը՝ նիստին ներկայանալու առումով։ Նա նշեց, որ նման առաջարկի համար առկա է քննիչ հանձնաժողովի անդամների ընդհանուր համաձայնությունը։

Հանձնաժողովի անդամ Էդմոն Մարուքյանն էլ նկատեց, որ սահմանադրական փոփոխությունների ժամանակ ներկայացված փաթեթում դրույթ կար, որը վերաբերում էր քննիչ հաձնաժողովին:

«Ես պնդում էի, որ հանձնաժողովը պաշտոնյայի կանչելու լիազորություն ունենա, այդ առաջարկը մերժվեց, Սահմանդրության մեջ չներառվեց և միայն ԱԺ կանոնակարգ օրենքի դրույթներից մեկն է ներառել  որպես սահմանդրական նորմ: Հիմա որտե՞ղ է գրված, որ պաշտոնատար անձինք պարտավոր են քննիչ հանձնաժողովի կանչին ներկայանալ, որովհետև այդ առաջարկը մերժվել է»,-ասաց նա:

Գևորգ Կոստանյանը շեշտեց՝ օրենքով հստակ սահմանված է, որ քննիչ հաձնաժողովի պահանջով հանձնաժողովին պետք է տրամադրվի ցանկացած տեղեկատվություն՝ ինչպես գրավոր, այնպես էլ բանավոր:

Էդմոն Մարուքյանը հակադարձեց՝ այն ժամանակ երբ ինքը պնդում էր, որ պաշտոնատար անձինք պարտավոր են ներկայանալ, ամբողջ պետական համակարգն աշխատեց, որ ներկայանալու դրույթն անտեսվի:

«Հիմա նրանք կարող են չներկայնալ։ Եթե պաշտոնատար անձի հրավիրեն, կասի ըստ Սահմանադրության՝ հարցերը ուղարկեք և ես կպատասխանեմ, կուղարկեմ»,-ասաց նա: 

Գևորգ Կոստանյանն էլ ուշադրություն հրավիրեց այն հանգամանքի վրա, որ Մարուքյանի առաջարկն այն ժամանակ չի ընդունվել, քանի որ գործող կանոնակարգ սահմանադրական օրենքով իրավիճակը հստակ կարգավորում էր:

«Կանոնակարգ սահմանադրական օրենքում հստակ գրված է»,-հավելեց Արփինե Հովհաննիսյանը, ինչը հաստատեց նաև ՀՀ արդարադատության փոխնախարար Արթուր Հովհաննիսյանը:

Վերջինս նաև հետաքրքրվեց, թե պաշտոնաթող պաշտոնատար անձինք, ովքեր պարտավոր են քննիչ հանձնաժողովին տեղեկություն տալ, պարտավո՞ր են առհասարակ ներկայանալ, եթե նախկինում ևս պաշտոն են զբաղեցրել, թե ոչ:

Արփինե Հովհաննիսյանը նշեց, որ հարցը պետք է ավելի նեղ դիտարկելև հաշվի առնել՝ արդյոք անձը քննիչ հանձնաժողովի ստեղծման պահին պաշտոն է զբաղեցրել:

Նշենք, որ բոլոր ներկա պատգամավորները կողմ էին նախագծին, քվեարկությանը միայն Էդմոն Մարուքյանը չմասնակցեց:

Փոխնախարար Հովհաննիսյանը նշեց, որ առաջարկությունների մասով դիրքորոշումը  կհայտնեն ԱԺ նիստում՝ մինչև մտքերի փոխանակության ավարտը: