Ձեր վստահելի աղբյուրը

ՀՀ Վարչապետ Նիկոլ Փաշինյանը մասնակցել է  «Կամար» բիզնեսի կենտրոնի հանդիսավոր ներկայացման արարողությանը: Միջոցառմանը մասնակցում էին ՀՀ ԿԲ նախագահ Արթուր Ջավադյանը, «Ամերիա» խմբի Խորհրդի անդամ Ռուբեն Վարդանյանը, «Ամերիաբանկ» ՓԲԸ  ղեկավար անձնակազմը, «Կամար» բիզնես կենտրոնում գործունեություն ծավալող ընկերությունների ներկայացուցիչները, այլ հյուրեր և ԶԼՄ-ների ներկայացուցիչներ:

«Ամերիաբանկ» ընկերությունից հայտնում են՝ ելույթներով հանդես են եկել «Կամար» նախագծի ղեկավար Արտաշես Կազախեցյանը, շենքի գլխավոր կապալառու «Հորիզոն 95» ՍՊԸ Գլխավոր տնօրեն Գագիկ Գալստյանը, Ճարտարապետ Միքայել Հասրաթյանը, քանդակագործ Դավիթ Երևանցին:

Բիզնես կենտրոնի թանգարանում հյուրերը ծանոթացել են շենքի պատմությանը, այնուհետև շրջայց են կատարել բիզնես կենտրոնում ամենամեծ տարածք զբաղեցնող Ամերիաբանկի գլխամասային գրասենյակում և «Կամար» մասնաճյուղում: Տեղի է ունեցել նաև շենքի պատմությունը ներկայացնող ֆիլմի ցուցադրություն:

Ընկերությունը տեղեկություններ է տրամադրել բիզնես կենտրոնի մասին.

Ընդհանուր տեղեկություններ  «Կամար» բիզնես կենտրոնի մասին

• «Կամար» բիզնես կենտրոնի ճարտարապետներն են Ռուբեն և Միքայել Հասրաթյանները: Շենքը նախագծվել է 2014թ-ին:
• Ծառի մետաղյա քանդակի հեղինակներն են.
 ճարտարապետ Ռուբեն Հասրաթյանը
 քանդակագործ Դավիթ Երևանցին
• «Կամար» բիզնես կենտրոնը միավորում է 3 տարբեր ժամանակաշրջանի 
շենքերը` ցարական, խորհրդային, ժամանակակից.
 «Սև» շենքը, որը կառուցվել է Ամասիայի սև տուֆից, ինչով և պայմանավորված է շենքի անունը, կառուցվել է թիֆլիսահայ ճարտարապետ Միքայել Օհանջանյանի նախագծով` 1910թ-ին: Այն եղել է ժամանակին տարածաշրջանում մեծ դերակատարում ունեցող Թիֆլիսի առևտրային բանկի Էրիվանյան մասնաճյուղի շենքը, ուր մինչ այսօր էլ իրականացվում է բանկային գործունեություն:
 Գյուղատնտեսական բանկի շենքը կառուցվել 1926թ-ին` ճարտարապետ Նիկոլայ Բունիաթյանի նախագծով, որի կառուցման գաղափարը պատկանում է Ալեքսանդր Թամանյանին:

BREEM հավաստագիր
«Կամար» բիզնես կենտրոնն Ա դասի առաջին «կանաչ» բիզնես կենտրոնն է Հայաստանում: Արժանացել է BREEM հավաստագրի:
• BREEM-ը 1990թ-ին բրիտանական BRE Global ընկերության կողմից ստեղծված մեթոդաբանություն է: BREEAM (Building Research Establishment Environmental Assessment Method, թարգմ.՝ «շենքի էներգաարդյունավետության գնահատման մեթոդ»):
•  «Կամար» բիզնես կենտրոնը Հայաստանում BREEAM հավաստագրին արժանացած առաջին նախագիծն է: Այն իր էկոարդյունավետությամբ գերազանցում է Հայաստանի գրեթե բոլոր շենք-շինություններին:  BREEAM հավաստագրի ստացումը ենթադրում է մի շարք բարձրակարգ չափանիշների պարտադիր ապահովում կառույցի երեք հիմնական փուլերում` նախագծման, շինարարական և հետշինարարական:
• «Կանաչ» շենքերի կառուցման ընթացքում օգտագործվում են շրջակա միջավայրի համար բացառապես անվտանգ նյութեր: Օգտագործվող շինանյութի որակն ու դիմացկունությունը ապահովում են կառույցի երկարակեցությունը, իսկ էներգախնայող համակարգերը թույլ են տալիս նվազեցնել կոմունալ ծախսերը մինչև 35%:

ԹԱՆԳԱՐԱՆ
• Կարևորելով մեզ հասած պատմական ժառանգությունը և սերունդներին փոխանցելու առաքելությունը` «Կամար» բիզնես կենտրոնում ստեղծվել է թանգարան, որտեղ ներկայացված են բացառիկ լուսանկարներ Երևանի, Թբիլիսիի արխիվներից, հավաքագրված է հսկայական ինֆորմացիա «Սև» շենքի, Գյուղատնտեսական բանկի շենքի, դրանց միջև տարբեր ժամանակներում տեղակայված տարատեսակ կառույցների և հարակից կառույցների, ընդհանուր հրապարակի վերաբերյալ:
• Արխիվային նյութերի ուսումնասիրությունների ժամանակ է բացահայտվել «Սև» շենքի իրական ճարտարապետը` Միքայել Օհանջանյանը: Մինչև վերջերս շենքի ճարտարապետ էր համարվում Բորիս Մեհրաբյանը:

ԳԻՐՔ
Տպագրվել է նաև ողջ պատմությունը ներկայացնող գիրք, ուր տեղ են գտել տարբեր մասնագետների` ճարտարապետների, պատմաբանների գնահատականները «Կամար» բիզնես կենտրոնի վերաբերյալ, հետաքրքիր փաստեր, երևանցիների հիշողություններ:

Կամարի կանաչ պատը
• «Կամար» բիզնես կենտրոնի կանաչ պատը, որն աշխարհում ամենամեծերից է, ունի 20 մ բարձրություն, ընդհանուր մակերեսը կազմում է 160 քմ։
• Ուղղահայաց կանաչապատման ամենակարևոր առավելությունը յուրահատուկ թարմությունն ու բնական տեսքն է, որ ունի շինությունը։ Բացի այդ, կանաչ պատը կատարում է օդի զտում, ջերմամեկուսացում և նվազեցնում է աղմուկը: Այն ծառայում է նաև որպես արևի ճառագայթներից պաշտպանող ծածկ՝ մեղմացնելով շոգը 8-10 աստիճանով։
• Անհրաժեշտ խոնավությունն ապահովելու համար յուրաքանչյուր պատի տակ կառուցվել են փոքրիկ ջրվեժներ, որտեղից ջուրը գոլորշիանում է` ստեղծելով լրացուցիչ խոնավություն:

Շենքի վերաբերյալ ընդհանուր տեխնիկական տվյալներ և այլ մանրամասներ
• Շենքն ունի 9 հարկ, ստորգետնյա կայանատեղի` 4.8 հազ. քմ` 100 մեքենայի կայանման հնարավորությամբ: Էլեկտրական մեքենաների համար նախատեսված է լիցքավորման կայան:
• Շենքի տանիքում գործում է արևային կայան: 
• Շենքում գործում է 8 վերելակ, որոնք էներգախնայող են և իջնելիս ռեգեներացիայի միջոցով արտադրում են էլեկտրաէներգիա: Յուրաքանչյուրը կարող է տեղափոխել 15 մարդ, 5 րոպեում բոլորը միասին` 525 մարդ:
• Հարկերի ծածկերը պրեդալ տեսակի են` բաղկացած երկաթբետոնե միաձույլ տարրերից, որոնց միջև ընկած հատվածներում տեղադրված է հատուկ մեկուսացնող նյութ, որն ունի ջերմամեկուսիչ և ձայնամեկուսիչ հատկություն:
• Պատուհանները եռաշերտ ապակեպատումով են` ապակիները հատուկ էներգախնայող հնարավորությամբ:
• Բոլոր լուսային սարքերը էներգախնայող led տեսակի են:
• Շենքում մաքուր օդն ապահովվում է 10 առանձին ավտոմատ սարքավորումների միջոցով:

Ամերիաբանկի գլխամասային գրասենյակը 
Ամերիաբանկի գլխամասային գրասենյակի ինտերիերի դիզայնն իրականացված է «Ամերիա քաղաք» թեմայի տրամաբանության ներքո: Հարկերի միջավայրը խորհրդանշում է  քաղաքների զարգացումը` տանելով մեզ անցյալից դեպի ապագա: Ներկայացված են հին Երևանը, արդյունաբերական դարաշրջանը խորհրդանշող ամերիկյան դաուն Թաունը, մեր օրերի կարևոր  գաղափարախոսություներից մեկը` էկոլոգիական քաղաքը խորհրդանշող կանաչ քաղաքը  և նորարարական զարգացած տեխնոլոգիաների ապագայի քաղաքը:

Բոլոր հարկերում  աշխատասենյակները և հանգստյան գոտիները ձևավորված են այս 4 կոնցեպտի ներքո:

Ամերիաբանկի «Կամար» մասնաճյուղը
• Ինտերիերում պահպանված են պատմական շենքի տուֆե քարերը, որոնք համադրված են ժամանակակից դիզայներական լուծումների հետ:

• Սպասարկման սրահը կառուցված է ժամանակակից ամենաբարձր պահանջներին համապատասխան, հագեցած է գերժամանակակից տեխնոլոգիական միջոցներով:
• Մասնաճյուղն ունի իր առանձին հանդիպումների սրահը:
• Տեղակայված է 4K որակի վիդեոպատ:
• Մասնաճյուղն ունի պահատուփերի սրահ:
• Սրահին կից գործում է 24/7 ռեժիմով աշխատող Express Banking համակարգը:















Լուսանկարները՝ «Ամերիաբանկ» ընկերությանն են։