Ձեր վստահելի աղբյուրը

«Հոկտեմբերի 11-ի երեկոյան Հանրապետության հրապարակում նախատեսված գալա-համերգը բաղկացած է լինելու 3 մասից, որի ավարտական մասը նվիրված էր լինելու հենց Շառլ Ազնավուրին՝ իր անմիջական մասնակցությամբ։ Քանի որ աշխարհահռչակ շանսոնյեն իրեն միշտ բեմի վրա էր պատկերացնում, մենք այդ մասը պահպանելու ենք ու այն շատ ավելի շեշտադրումներով նվիրված է լինելու Շառլ Ազնավուրի հիշատակին»,-այսօր Ֆրանկոֆոնիային նվիրված մամուլի ասուլիսին ասաց ՀՀ ԱԳՆ գլխավոր քարտուղար, ՖՄԿ գագաթնաժողովի անցկացման արտգործնախարարության աշխատանքային հանձնախմբի ղեկավար Վահագն Մելիքյանը։

Վահագն Մելիքյանը նշեց, որ Շառլ Ազնավուրի հիշատակին նվիրված միջոցառումների վերաբերյալ ուղիղ կապի մեջ են Ելիսեյան պալատի հետ, կան որոշակի առաջարկներ, որոնք դեռևս քննարկման մեջ են. «Չի բացառվում, որ կլինեն աշխարհահռչակ աստղեր, որոնք կցանկանան իրենց մասնակցությունն ունենալ»։

Համերգին երգելու է Անջելիկ Կիջոն, ով համարվում է Աֆրիկյան մայրցամաքի Սելին Դիոնը, Զազը։ Համերգը բաց է լինելու բոլորի համար։

ՀՀ հանրային հեռուստաընկերության գործադիր տնօրեն Մարգարիտա Գրիգորյանը տեղեկացրեց, որ Հանրայինը ուղիղ եթերով կհեռարձակի Ֆրանկոֆոնիայի գագաթնաժողովի բացումն ու գալա-համերգը։

ԱԳՆ մամուլի խոսնակ Տիգրան Բալայանը նշեց, որ Ֆրանկոֆոնիայի գագաթնաժողովը լուսաբանելու համար հավատարմագրվել է 488 լրագրող, որից միայն 143-ն են տեղական ԶԼՄ-ներ։