Ձեր վստահելի աղբյուրը

«ԱԺ պետաիրավական հանձնաժողովում «Ծառուկյան» խմբակցության պատգամավոր Գևորգ Պետրոսյանը քննիչ հանձնաժողովի նիստին բանավոր կերպով առաջարկություն հնչեցրեց, որի թղթային տարբերակը մեզ հասանելի դարձավ երեկ երեկոյան։ Կառավարությունը, բնականաբար, ամբողջությամբ պատրաստվելու և դիրքորոշում հայտնելու հնարավորություն չունեցավ» ԱԺ-ում հայտարարեց արդարադատության փոխնախարար Արթուր Հովհաննիսյանը:

Հիշեցնենք՝ խոսքը «Ծառուկյան» խմբակցության պատգամավոր Գևորգ Պետրոսյանի այն  առաջարկի մասին է, որով քննիչ հանձնաժողովը ժամանակավոր որոշ խոչընդոտների դեպքում պետք է նիստն ընդհատի, և ընդհատված նիստը շարունակվի, երբ վերանան նիստն ընդհատելու համար հիմք հանդիսացած հանգամանքները։

«Այստեղ գործում է  նույն մեխանիզմն, ինչ-որ նախկին կառավարությունում էր, երբ կառավարությունը նախագծերը բերում էր և հանձնաժողովներում առաջինից երկրորդ ընթերցման արանքում արագ փոփոխություններ անում, և պատգամավորները մշտապես բողոքում էին, որ չեն հասցնում արտահայտել իրենց դիրքորոշումը: Հիմա փաստորեն կառավարությունն է ընկել նույն դրության մեջ»,-նշեց փոխնախարարը։ 

Արթուր Հովհաննիսյանը միաժամանակ անդրադարձ կատարեց այն քաղաքական դրդապատճառներին, թե ինչու է նման առաջարկ ներկայացվել։ 

«Առաջարկը վերաբերում էր բացառապես այն իրադրությանը, երբ որ ԱԺ-ի կողմից երկրորդ անգամ վարչապետի ընտրություններ տեղի կունենան, և ընտրության օրը փաստորեն կխոչընդոտվի պատգամավորների քվեարկությունն ինչ-ինչ պատճառներով՝ արտակարգ իրավիճակների, թե այլ պատճառներով, և դրանից հետո կգա այն հետևանքը, որ ԱԺ-ն իրավունքի ուժով կցրվի: Փաստորեն առաջարկը վերաբերում էր նրան, որպեսզի կանխվեր այս հնարավորությունը։  Այսինքն, եթե պայմանավորվածություն ձեռք բերվի առաջին իսկ հնարավորության դեպքում արտահերթ ընտրություններ իրականացնել, և դա էլ պայմանավորվի այն հանգամանքով, որ վարչապետը հրաժարական տա և պայմանավորվածություն ձեռք բերի, որ ոչ մի քաղաքական ուժ վարչապետի թեկնածու չի առաջադրելու, և հանկարծ դրժվի այս պայմանավորվածությունը, այլևս ժողովուրդը չի կարողանալու պայքարել, որպեսզի իշխանությունը զբաղեցնի ժողովրդի ձայնը արտահայտող ներկայացուցիչը»,- նշեց նա:

Գործադիրի ներկայացուցիչն այնուհետև անդրադարձավ իրավական տեսանկյունից առկա խնդիրներին:

«Նախ, ո՞վ է որոշում արտակարգ իրավիճակներ առկա՞ են, թե առկա չեն, խոչընդոտվո՞ւմ է պատգամավորների մասնակցությունը, առկա՞ է սպառնալիք, թե ոչ, այս հարցի որոշումը թողնված է միանձնյա ԱԺ նախագահին: Ո՞վ է որոշելու՝ քրեորեն պատժելի արարք է իրականացվե՞լ, եթե ոչ դատարանն՝ իր դատական ակտով։ Երկրորդ, եթե այդքան ծայրահեղ ենք նայում հարցին, ապա ինչ է լինելու, երբ խոչընդոտեն ԱԺ նախագահի գործունեությունը, որ նա հայտարարություն չանի: Սրանք  հարցեր են, որոնք բաց են մնում այս նախագծով։ 

Ասենք՝ պատգամավորներին խոչընդոտում են, և կոնկրետ ուժին են խոչընդոտում, որ չեն թողնում նիստին մասնակցի, սակայն նիստը իրավազոր է։ Այսինքն՝ մի ամբողջ ուժ հնարավորություն չի ունենում մասնակցել նիստին ՝ չնայած նիստն իրավազոր է։ Ի՞նչ ենք անում այդ դեպքում, փաստորեն թողնում ենք, որ այդ նիստը լինի։ Սա ևս արդարացված չէ»,-ասաց Արթուր Հովհաննիսյանը՝ շեշտելով, որ կառավարության դիրքորոշումը նախագծի նկատմամբ բացասական է, և ներկայացված կարգավորումները՝ թերի:

Փոխնախարարն ընդգծեց, որ լուծելու արժանի բավական հարցեր կան, իսկ քաղաքական դրդապատճառները կառավարությունը  թողնում է մի կողմ։