Ձեր վստահելի աղբյուրը

«Որևէ մեկը չի ասում, որ արտահերթ խորհրդարանական ընտրություններ տեղի չեն ունենալու,  և մենք բանակցել ենք արտահերթի հետ կապված, երեկ էլ մեր խմբակցության ղեկավարը բանակցեց վարչապետի հետ, ով հայտարարեց, որ բանակցությունների երկրորդ ռաունդ է սպասվում»,- երեկոյան ԱԺ արտահերթ նիստից հետո լրագրողների հետ զրույցում ասաց ԱԺ փոխնախագահ Էդուարդ Շարմազանովը։

«Այն, ինչ այսօր տեղի է ունենում  Կառավարության ղեկավարի կողմից՝ ԱԺ-ի գործերին միջամտություն է։ Ազգային ժողովն անկախ մարմին է, և պատգամավորներն ազատ են քվեարկել իրենց խղճի և համոզմունքի համաձայն։ Ով է ասում, որ մենք քաղաքացիներին դեմ ենք դուրս եկել, սա, պարզապես,  այլ բան է»,- նշեց Շարմազանովը։

Լրագրողների հարցերին ի պատասխան՝ ինչպե՞ս է պատրաստվում դուրս գալ խորհրդարանից, քանի որ ցուցարարները փակել են ԱԺ բոլոր մուտքերը, Էդուարդ Շարմազանովն արձագանքեց, որ պետք է դուրս գա, քանի որ գործուղման է մեկնելու։

«Մի քանի ժամից պետք է մեկնեմ գործուղման, չգիտեմ՝ ոնց պետք է մեկնեմ։ Դե, եթե չկարողնանք գնալ, ուրեմն Հայաստանը համապատասխան վեհաժողովում ելույթներ չի ունենաև և կզրկվի նման կարևոր համաժողովին մասնակցելու հնարավարությունից», - հավելեց ԱԺ փոխնախագահը։