Ձեր վստահելի աղբյուրը

«Եթե դուք ձեր խմբակցության կողմից առաջադրված վարչապետի հետ ներքին խնդիրներ ունեք, դա ձեր հարցն է, խնդրում եմ չտեղափոխել Ազգային ժողով։ Այստեղ զուտ իրավաբանական հարց է լուծվում, այսինքն՝ եթե ԱԺ-ն բնականոն աշխատանք պետք է իրականացնի, և դա խոչընդոտվում է, մենք աշխատանքներն ապահովագրում ենք այդ խոչընդոտներից»,- այսօր խորհրդարանում նիստի ժամանակ հայտարարեց «Ծառուկյան» խմբակցության  պատգամավոր Գևորգ Պետրոսյանը՝ անդրադառնալով «Ելք» խմբակցության պատգամավոր Էդմոն Մարուքյանի այն հայտարարությանը, որ «Ազգային ժողովի կանոնակարգ» ՀՀ սահմանադրական օրենքում փոփոխություն կատարելու մասին» նախագծով փորձ է արվում կասեցնել խորհրդարանն իրավունքի ուժով արձակելու պրոցեդուրան։

«Եթե անգամ պայմանականորեն ընդունենք, որ սա կապված է հավանական դեպքերի հետ, փոխանակ իրավաբանները խոսեն հակասահմանադրական կարգով ԱԺ աշխատանքները տապալելու մասին, խոսում են դրան աջակցելու մասին։ Ի՞նչ է նշանակում գալ, կանգնել այստեղ և փոխանակ իրավաբանությունը զարգացնել՝ զարգացնել ֆանտազիան, զբաղվել գուշակությամբ։ Գուշակությունը քաղաքականության մեջ խիստ է պատժվում»,- ասաց պատգամավորը։

ՀՀԿ խմբակցության պատգամավոր Արփինե Հովհաննիսյանն իր հերթին նկատեց, որ նախորդ գումարման խորհրդարանի իրենց գործընկերներից մեկն անընդհատ կրկնում էր՝  «Սահմանադրության հայեցողական մեկնաբանությունը վերջերս շատ նորաձև է դարձել, ում ոնց հարմար է, Սահմանադրությունն այդպես է մեկնաբանում»։

«Խոչընդոտումն այնքան ակնհայտ պետք է լինի, որ ոչ մեկի մոտ կասկած չհարուցի։ ԱԺ նախագահը ոչինչ չի որոշում, եղած փաստն ընդամենը պետք է հայտարարի։ Իրավական անգամ նրբին խնդիր չկա, ես ձեզ հավաստիացնում եմ և զերծ եմ մնում որևէ հայեցողական մեկնաբանությունից»,- ասաց ԱԺ փոխնախագահը։