Ձեր վստահելի աղբյուրը

Խորհրդարանում կառավարության անդամների հետ հարցուպատասխանի ժամանակ «Ելք» խմբակցության պատգամավոր Ալեն Սիմոնյանը վարչապետ Նիկոլ Փաշինյանից խնդրեց ներկայացնել արտահերթ ընտրությունների անցկացման հարցը։

«Լինելու՞ են բանակցություններ, լինելու՞ է որևիցե փաստաթուղթ և ընդհանրապես ինչ փուլում է գտնվում գործընթացը»,- հարցրեց պատգամավորը։

Կառավարության ղեկավարը պատասխանեց. «Երեկ ԱԺ նախագահի աշխատասենյակում հանդիպման ընթացքում, որին ԱԺ նախագահը անձամբ ներկա չի եղել, նրա հետ քննարկումներն առանձին են եղել, եղել է հետևյալ տրամաբանությունը՝ ես ասել եմ, որ դեկտեմբերին ՀՀ-ում պետք է տեղի ունենան արտահերթ խորհրդարանական ընտրություններ, ասել եմ մեխանիզմի մասին, և Հանրապետական, «Ծառուկյան դաշինք» խմբակցությունների ներկայացուցիչներն ասել են, որ վարչապետի պաշտոնը թափուր մնալու դեպքում իրենք չեն պատրաստվում վարչապետի թեկնածու առաջադրել։ Սրան համաձայն է եղել նաև ՀՅԴ-ն»։

Փաշինյանի կարծիքով՝ գործընկերները հստակ արձանագրել են այն քաղաքական իրավիճակը, որն այսօր առկա է երկրում. «Կարծում եմ, որ խելամտությունը ստիպում է, որ երկրորդ մայիսի 1 անելու գաղթակղությանը տրվելն անտեղի և ավելորդ կլինի։ Այսօր մամուլում որոշակի հրապարակումներ կան, որոնց տրամաբանությունը առնվազն նույնական չէ իմ նշած բովանդակության հետ և անկեղծ ասած՝ դա մեծ խնդիր չեմ համարում, համենայն դեպս, ՀՀ քաղաքացիների և մեր կառավարության համար։ Կարծում եմ՝ խնդիրներ առաջանում են և կառաջանան նման հայտարարություններ անողների համար։  2018 թվականի մայիսի ես այս ամբիոնից էլ հայտարարեցի քաղաքական որոշ ուժերի ինքնասպանություն գործելու փաստի մասին, և կարող եմ ասել, որ ցավալիորեն, ինքնասպանությունների շարքը շարունակվում է»։