Ձեր վստահելի աղբյուրը

«Երեկ մենք որևէ պայմանավորվածություն ձեռք չենք բերել, լսել ենք տեղեկատվություն, թե ինչ է պատրաստվում կառավարությունն անել, ինչ մտադրություններ ունի։ Կային, բնականաբար, փաստարկներ, հակափաստարկներ, այդ բոլորը քննարկվեց, և կառավարությունը մնաց իր տեսակետին, որ ԱԺ արտահերթ ընտրությունները նախապատրաստվում են դեկտեմբեր ամսին»,- այսօր լրագրողների հետ զրույցում ասաց «Ծառուկյան» խմբակցության պատգամավոր Միքայել Մելքումյանը։

Հարցին՝ պայմանավորվածություն եղել է, որ ԲՀԿ-ն վարչապետի թեկնածու չի առաջադրելու, պատգամավորը պատասխանեց տարբեր հարցերի շուրջ խոսակցություններ են եղել, բայց պայմանավորվածություններ ձեռք չեն բերվել։

«Պայմանավորվածություն կարող է  լինել այն դեպքում, եթե պաշտոնապես քննարկես։ Պայմանավորվել ենք շարունակել այդ շփումները։ Մենք մեր տեսակետներին ենք մնում։ Հիմնավորումն այն է, որ պետք է լինի նոր Ընտրական օրենսգիրք, որն առայժմ չկա։ Պետք է որոշակի ադապտացիոն շրջան, որպեսզի քաղաքական ուժերի համար ստեղծվեն հավասար պայմաններ, և երրորդ՝ քաղաքական կոնսենսուս»,- ասաց «Ծառուկյան» խմբակցության պատգամավորը։

Միքայել Մելքումյանը կրկին շեշտեց՝ իրենք որևէ պաշտոնական որոշում չունեն, շփումները շարունակվում են։

Նրա խոսքով, ՀՀ վարչապետի հետ երեկվա հանդիպման ժամանակ քննարկվել է նաև վարչապետ չառաջադրելու պատրաստակամությունը գրավոր ամրագրելու հարցը, սակայն այս հարցում ևս վերջնական պայմանավորվածություն ձեռք չի բերվել։

«Եղել է տեսակետ, որ ջենթլմենական պայմանավորվածություն լինի, պարտադիր չէ՝ այդ հուշագիրը լինի։ Գործող կառավարությունը, որ ձևավորվել էր, առանց հուշագրի էր չէ՞ ձևավորվել»,- հիշեցրեց պատգամավորը։