Ձեր վստահելի աղբյուրը

«Պաշտոնանկ արված նախարարների թափուր պաշտոնների համար արդեն իսկ թեկնածուներ կան»,- ԱԺ-ում լրագրողների հետ ճեպազրույցում այսօր հայտարարեց ՀՀ կրթության և գիտության նախարար, «Քաղաքացիական պայմանագրի» անդամ Արայիկ Հարությունյանը։

«Երեկվա իրադարձություններից հետո թեթև քննարկում եղել է, երբ վերջնական որոշումներ կայացնենք, տեղյակ կպահենք»,- ասաց նա։

Լրագրողները նախարարից հետաքրքրվեցին՝ ինչու են շեղվում նախապես հայտարարված այն դրույթից, որ արտահերթ խորհրդարանական ընտրությունները պիտի լինեն մայիս-հունիս ամսին, Արայիկ Հարությունյանն արձագանքեց.

«Հայաստանում կա քաղաքական ճգնաժամ և այդ քաղաքական ճգնաժամը սեղմ ժամկետում պետք է հանգուցալուծվի։ Մենք այն ժամանակ ասում էինք՝ հիմա ընտրությունները ձեռնտու են Քաղաքացիական պայմանագրին և, ըստ էության, հեղափոխական ուժերը կստանային բացարձակ մեծամասնություն։ Որպեսզի հավասար պայմաններ ստեղծեինք քաղաքական ուժերի  համար, ասացինք, որ ժամանակ տանք նրանց հավասար պայմաններում պատրաստվել այդ ընտրություններին, սակայն հիմնական քաղաքական ուժերը դրա փոխարեն «սատանի մայլում քյանդրբազություն են անում»,-շեշտեց նա: