Ձեր վստահելի աղբյուրը

ՀՀԿ փոխնախագահ, ԱԺ պատգամավոր Արմեն Աշոտյանն այսօր լրագրողների հետ զրույցում հայտարարեց, որ կեսօրից հետո կուսակցությունը հանդես կգա հայտարարությամբ, որտեղ ընդհանրական գնահատականներ կտան երեկվա իրադարձություններին` այդ թվում վարչապետի հետ հանդիպմանը:

««Հանդիպում» բառը պատահական չէ, որ օգտագործում եմ: Դա բանակցություն չէր, որովհետև վարչապետն ասաց, որ եկել էր պարզապես իրազեկելու ԱԺ պատգամավորներին իր քաղաքական որոշումների մասին: Դա կոչել բանակցություն չի կարելի, դա երկար խորը խոսակցություն էր, որի գնահատականը տվեց ինքը՝ Փաշինյանը` որպես իրազեկում»,- նշեց նա։

Արմեն Աշոտյանը նկատեց՝ ակնհայտ էր, որ երեկվա լարված գիշերը վերաբերում էր ոչ այնքան ԱԺ-ին, որքան երկրում ստեղծված իրավիճակում սահմանադրականության ու կայունության ապահովելու գերխնդրին:

«Այդ տեսակետից կարծում եմ, որ սահմանադրականության վերականգնումը, ԱԺ բնականոն գործունեության վերականգնումը, պատգամավորների ազատ տեղաշարժի իրավունքի վերականգնումը, մթնոլորտի հանդարտեցումը կարևոր էին, բայց պետք չէր հասցնել իրավիճակն այդ կիզակետերին, որպեսզի հետո ցույց տալ թե իրավիճակը կարողանում ես լուծել»,- ասաց պատգամավորը։

Աշոտյանը նշեց, որ ամենատարածված փոխզիջումային տարբերակը եղել է առաջարկը՝ ընտրությունները տեղափոխել մայիս. «Հասցնենք բարեփոխել Ընտրական օրենսգիրքը, պատշաճ իրազեկենք միջազգային դիտորդներին, որ նաև գան ընտրությունների, թողնենք մնացած կուսակցությունները նույնպես պատրաստվեն ընտրությունների, հանդարտեցնենք իրավիճակն ու նոր գնանք ընտրությունների»։

ՀՀԿ փոխնախագահի խոսքով` վարչապետ Նիկոլ Փաշինյանի որոշումը՝ հրաժարական տալ և դեկտեմբերին արտահերթ խորհրդարանական ընտրություններ կազմակերպել, նախապես ծրագրված գործողությունների ծրագիր էր։

«Դրա մասին նա խոսեց դեռ Վահրամ Բաղդասարյանի հետ հանդիպումից հետո, իսկ երեկվա օրինագծի ընդունումը պարզապես պատրվակ էր՝ արագացնելու սեփական քաղաքական ծրագրերը կյանքի կոչելու ցանկությունը»,-ասաց Աշոտյանը։

ՀՀԿ փոխնախագահը միաժամանակ շեշտեց՝ եթե խնդիրն այն է, որ վարչապետն ու իր թիմը ուզում են կապիտալիզացնել իրենց 2/3-ը Ազգային ժողովում որպես մանդատներ, դա այլ հարց է. «Եթե խնդիրն այն հիմնավորման մեջ է, որ փորձում են մեզ հրամցնել, ապա այդ հիմնավորումներից ոչ մեկը քննադատության չի դիմանում, ոչ տնտեսականը, ոչ մնացած բոլոր հիմնավորումները։ Հիմնավորումը մեկն է ինձ համար՝ Նիկոլ Փաշինյանն օր առաջ ուզում է Ազգային ժողովում ունենալ մեծամասնություն, և Աստված մի արասցե, վարկած է, արդեն մտահգություն է՝ ինչ-որ աշխարհաքաղաքական խաղերի շրջանակներում»։

«Վարչապետն ասաց, որ ինքը պատրաստ է խոսել ամեն ինչի մասին, բացի դեկտեմբերից: Ակնհայտ է, որ շատ սրամիտ ձևակերպում էր գտել սեփական քաղաքական միահեծան դիրքորոշումը հաղորդելու համար», - ասաց նա։