Ձեր վստահելի աղբյուրը

ՀՀ ֆինանսների նախարար Ատոմ Ջանջուղազյանն այսօր լրագրողների հետ հանդիպման ժամանակ պատասխանելով հարցին, թե ինչպես կբոնորոշի հաջորդ տարվա բյուջեն՝ նշեց, որ «սա մեր երազանքների բյուջեն չէ»:

«Արդյոք սա մեր երազանքների բյուջեն է, ոչ, արդյոք մենք համարում ենք՝  մեր երազանքն այն է, որ պետք է ապրենք երկրում, որտեղ մեկ շնչին բաժին ընկնող ՀՆԱ-ն կանխատեսվում է մոտ 4600 դոլար, ոչ։ Մենք պատիկներով ավելի հավակնություններ ունենք», - ասաց ֆինանսների նախարարը։

Ատոմ Ջանջուղազյանը նշեց, որ մի քանի գործընթաց է զուգահեռ ընթացքի մեջ, դրանցից մեկը տնտեսական աճի մոդելի քննարկումն է, որը կբերի մի հանգրվանի, որտեղ կորոշակիացնեն անելիքներն առաջիկա ժամանակահատվածի համար։

«Այդ ուղղությամբ կոնկրետ գործողություններ պետք է անենք, որպեսզի ունենանք այլ տնտեսություն»,- ասաց նախարարը:

Ատոմ Ջանջուղազյանի խոսքով՝ պետական բյուջեն պետք է լինի հավասարակշռված և չպետք է տանի արկածախնդրության: Նրա գնահատմամբ՝ 2019 թվականի բյուջեի նախագիծը զգուշավոր է:

Անդրադառնալով թոշակների բարձրացմանը՝ Ատոմ Ջանջուղազյանը նշեց, որ 2019 թ. պետբյուջեի նախագծում 20 միլիարդ դրամով ավելացել են կենսաթոշակային հատկացումները։
Հարցին՝ արդյոք շարունակելու են պարտք վերցնել, նախարարը դրական պատասխան տվեց:
«Այո, պարտք ենք վերցնելու, բայց վերցրած պարտքը ինչ-որ չափով ռիսկ է պարունակում, արդյոք դա մեր վիճակը վատացնելո՞ւ է, թե՞ լավացնելու: Սա է ամբողջ խնդիրը: Երբ ասում ենք՝  պարտք ենք վերցնում, դա նշանակում է վատացնելու է, բայց եթե այն մեր հարաբերական ցուցանիշը լավացնում է, այդ դեպքում պետք է համաձայնենք, որ  այդ պարտք վերցնելը ոչ թե վատթարացնող գործողություն է, այլ լավացնող»,- նշեց Ատոմ Ջանջուղազյանը:

Անդրադառնալով աղքատության խորացման մտահոգություններին, քանի որ նպաստները և աշխատավարձերը չեն բարձացվելու, ֆինանսների նախարարն ասաց՝  չի կարծում, թե իրենք խորացնելու են աղքատությունը. «Եթե աշխատավարձի և նպաստի չհիմնավորված բարձրացում տեղի ունենա, դա ավելի կխորացնի աղքատությունը՝ իր հետ տանելով նաև  նրանց, որոնք աշխատում և արդյունք են ստեղծում»:

Այս դեպքում Ատոմ Ջանջուղազյանը սխալ է համարում պարտք վերցնելն ու նպաստները բարձրացնելը. «Դա ոչ մի տեսակետից արդարացում չունի: Դեռ հարց է, թե մենք արդյոք պե՞տք է համակերպվենք, որ առողջ, աշխատունակ մարդը պետք է նպաստ ստանա, մոտիվացիա չունենա աշխատելու և իր ունեցածից ձերբազատվի, որպեսզի նպաստառուների ցուցակում իր տեղն ավելի հաստատուն զբաղեցնի»: