Ձեր վստահելի աղբյուրը

ՀՀ մշակույթի նախարարությունում հոկտեմբերի 1-ին կայացել է քննարկում Կ. Ստանիսլավսկու անվան պետական ռուսական դրամատիկական թատրոնի գեղարվեստական ղեկավարի պաշտոնում  առաջադրվող  թեկնածուների վերաբերյալ: Խորհրդակցությանը ներկա են եղել ՀՀ մշակույթի նախարարի տեղակալ Ն. Ղարիբյանը, ՀՀ մշակույթի նախարարի խորհրդական Կ. Խոդիկյանը, նախարարության ժամանակակից արվեստի վարչության պետ Ա. Ղազարյանը, նախարարության ժամանակակից արվեստի վարչության գլխավոր մասնագետ Ն. Հայրապետյանը, «Կ. Ստանիսլավսկու անվան պետական ռուսական դրամատիկական թատրոն» ՊՈԱԿ-ի տնօրեն Ֆ. Դավթյանը։

Մշակույթի նախարարության տեղեկացմամբ, Կ. Ստանիսլավսկու անվան պետական ռուսական դրամատիկական թատրոնի գեղարվեստական ղեկավարի պաշտոնում իրենց թեկնածությունն են առաջադրել 5 մասնակից. նախկինում՝  Խաբարովսկի շրջանային դրամայի թատրոնի գեղարվեստական ղեկավար, բեմադրիչ՝ Ռ. Մանուկյանը (ՌԴ քաղաքացի), Մոսկվայի Ս. Փարաջանովի անվան թատրոնի հիմնադիր, բեմադրիչ՝ Վ. Գաբբեն (ՌԴ քաղաքացի), Ղազախստանի Ալմաթի քաղաքի Մ. Յ. Լերմոնտովի անվան ռուսական դրամայի թատրոնի բեմադրող ռեժիսոր Կ. Ներսիսյանը (ՌԴ քաղաքացի), Կ. Սատնիսլավսկու անվան պետական ռուսական դրամատիկական թատրոնի ռեժիսոր Ն. Գրիգորյանը, ռեժիսոր-բեմադրիչ՝ Ս. Շահվերդյանը: Աշխատանքային խումբը նախապես ծանոթանալով մասնակիցների կողմից ներկայացրած կենսագրականների և թատրոնի առաջիկա գործունեության տեսլականի հետ, տեղում տեսաձայնագրված տարբերակով քննության առավ յուրաքանչյուր թեկնածուի կողմից ներկայացրած ռեժիսորական աշխատանքները, լուսանկարները, մամուլից՝ ակնարկները, հղումները, ինչպես նաև ստեղծագործական գործունեությունը լուսաբանող այլ նյութերը:

Շուրջ 3 ժամ տևած խորհրդակցության արդյունքում որոշվել է Կ. Ստանիսլավսկու անվան պետական ռուսական դրամատիկական թատրոնի գեղարվեստական ղեկավարի թափուր պաշտոնում առաջադրվող 5 թեկնածուներից ընտրել 2-ին՝ Կարեն Ներսիսյանին և Սուրեն Շահվերդյանին, ովքեր հնարավորություն կունենան առաջիկայում վերոգրյալ թատրոնում բեմադրել մեկական ներկայացում, ինչն էլ հնարավորություն կտա հետագա հստակ և համարժեք ընտրության: