Ձեր վստահելի աղբյուրը

Մարդու իրավունքնրի պաշտպան Արման Թաթոյանը շնորհավորական ուղերձ է հղել ուսուցիչներին նրանց մասնագիտական տոնի կապակցությամբ, նրանց ու նրանց ընտանիքներին մաղթել առողջություն և ամենայն բարիք։

Պաշտպանի աշխատակազմի հանրային կապերի բաժնի տարածած խոսքում մասնավորապես ասված է.

«Անփոխարինելի է ձեր առաքելությունը երեխաների կրթության, նրանց զարգացման ու իրավագիտակից քաղաքացի դաստիարակելու հարցում:  Դուք մեր երեխաների կյանքում առանցքային դեր ունեք՝ նրանց մեջ սերմանելով հայրենիքի, հասարակության, ընտանիքի և միմյանց հանդեպ սիրո ու հարգանքի բարձր արժեքներ: Այդ արժեքներն անհրաժեշտ են երեխաների ճիշտ դաստիարակության և նրանց հանդիպող մարտահրավերների հաղթահարման համար:

Յուրաքանչյուրս ենք պարտավոր հատուկ հարգանքով վերաբերվել ուսուցչի բարձր առաքելությանը։ Ձեր իրավունքների պաշտպանությունը պետք է լինի բոլորիս հոգածության առարկան՝ գործադրելով առավելագույն ջանքեր ապահովելու ուսուցչի մասնագիտական գործը պատվով կատարելու լիարժեք հնարավորություն:

Այս ամենն էլ իր հերթին երեխայի՝ կրթության իրավունքի երաշխավորման կարևոր գրավական է, նրա լավագույն շահի երաշխավորման բարձր գործոնը»։