Ձեր վստահելի աղբյուրը

Վարչապետ Նիկոլ Փաշինյանն այսօր տրանսպորտի, կապի և տեղեկատվական տեխնոլոգիաների նախարարության աշխատակազմին ներկայացրեց նորանշանակ նախարար Հակոբ Արշակյանին։ Նա նախ շնորհակալություն հայտնեց նախկին նախարար Աշոտ Հակոբյանին համատեղ աշխատանքի համար, մաղթեց հաջողություններ։

Վարչապետը շնորհավորեց նոր նախարարին՝ նշելով. «Հակոբ Արշակյանը մինչ այս տրանսպորտի, կապի և տեղեկատվական տեխնոլոգիաների նախարարի առաջին տեղակալն էր, մեր կառավարությունում համարվում էր, առավել ևս հիմա պետք է համարվի Հայաստանը տեխնոլոգիական երկիր դարձնելու քաղաքականության իրականացման թիվ մեկ պատասխանատուն։ Իհարկե, հետագայում պետք է մտածենք այս պատասխանատվությունն առավել արդյունավետ դարձնելու կառուցվածքային մեխանիզմների լրամշակման վերաբերյալ, բայց, ընդհանուր առմամբ, մեր խնդիրը հստակ է ձևակերպված՝ խնդիր ունենք Հայաստանը ագրարային-հանքարդյունաբերական-խաղադրույքներ կատարող երկրից վերածել բարձր տեխնոլոգիական արդյունաբերություն ունեցող երկրի, այս հարցում տրանսպորտի, կապի և տեղեկատվական տեխնոլոգիաների նախարարության դերը մեծ է»։

Ն. Փաշինյանն ասաց, որ այս ընթացքում տարբեր տեղերում, նաև նախարարություններում, տեղ-տեղ «չեմ ուզում ասել սաբոտաժի, բայց պաուզայի դրսևորումներ եմ տեսնում՝ սպասենք, տեսնենք՝ ինչ լինի»։

«Մի անգամ կառավարությանում խորհրդակցության ժամանակ  բարձրաստիճան պաշտոնյայի ասացի, որ իզուր մի սպասեք, որովհետև այն ինչի սպասում եք, տեղի չի ունենալու, որովհետև Հայաստանում ժողովրդի հաղթանակը անշրջելի է։ Ինչքան շուտ սա գիտակցենք, այնքան լավ բոլորիս համար։ Ակնհայտ է, որ մեր կառավարությունը, մեր հեղափոխությունը, վերջին միջազգային հարցումների համաձայն, ունի Հայաստանի քաղաքացիների 92 տոկոսից ավելի աջակցությունը։ Ես կարծում եմ, որ այս փաստը և մյուս փաստերը պետք է մեզ բոլորիս հուշեն, որ պետք է ընդամենը հին էջից դուրս գալ։ Եթե պարզվի, որ կան մարդիկ, ովքեր չեն ուզում հին էջից դուրս գալ կամ չեն կարող, ուրեմն մենք կփակենք հին էջը, այդ մարդիկ կմնան հին էջում։

Բայց Հայաստանը իսկապես ազատ և երջանիկ դարձնելու  ճանապարհին մեզ չի կանգնեցնի ոչ ոք և ոչինչ։ Մենք խնդիր ունենք ի վերջո հանուն այս ամենի համախմբել մեր ժողովրդի ողջ պրոֆեսիոնալ ներուժը։ Մենք չենք ընկնելու մարդկանց մեղադրանք ներկայացնել միայն այն բանի համար, որ, ենթադրենք, երկար տարիներ աշխատել են այս կամ այն կառավարության օրոք, այս կամ այն քաղաքական թիմի հետ։ Բացարձակապես դա կապ չունի։ Մեր գործունեության մեջ առաջնահերթությունը պետք է տրվի պրոֆեսիոնալիզմին, պետությանը, հայրենքին ծառայելու պոտենցիալին»։

Տրանսպորտի, կապի և տեղեկատվական տեխնոլոգիաների նախարարությունից հետո վարչապետը գնաց էներգետիկ ենթակառուցվածքների և բնական պաշարների նախարարություն՝ աշխատակազմին ներկայացնելու նորանշանակ նախարար Գարեգին Բաղրամյանին։ Վարչապետը նշեց, որ էներգետիկայի ոլորտում մեծագույն խնդիրը էներգետիկ համակարգը, բնական պաշարների կառավարման համակարգն առավել արդյունավետ դարձնելն է։ 

«Այս առումով մենք կարող ենք արդեն իսկ համարել, որ գործնական փուլ ենք մտել։ Այս ընթացքում կարողացել ենք մի քանի նախագծերի շուրջ, որոնք որոշակիորեն վտանգված էին, համաձայնություններ ձեռք բերել, որոնց նպատակը եղել է նախագծերը, համակարգերն արդյունավետ դարձնելը»,- նշեց կառավարության ղեկավարը։

Ն. Փաշինյանի խոսքով, լրջագույն խնդիր կա նաև ջրային ռեսուրսների կառավարման առումով։

«Էներգետիկ, բնական պաշարների համակարգն այն ոլորտներից է,  որտեղ իսկապես մեր երկիրը պետք է նոր մակարդակի հասնի»,- ասաց վարչապետը։

Արտակարգ իրավիճակների նորանշանակ նախարար Ֆելիքս Ցոլակյանին ներկայացնելով նախարարության աշխատակազմին, վարչապետն ասաց, որ նա պետական կառավարման համակարգում նոր մարդ չէ։

«Պարոն Ցոլակյանի պրոֆեսինալիզմը հայտնի է, նաև մարդկային հատկանիշները։ Ուրախ եմ, որ չնայած, ըստ էության, պարոն Ցոլակյանը հեղափոխական ակտիվիստ չի եղել, բայց նրա նշանակումը նախարարի պաշտոնում դրական արձագանք էր ստացել, ինչը նշանակում է, որ մեր հանրությունն ընդունում է այն տրամաբանությունը, որ  եկել է գծերը ջնջելու ժամանակը»,- ասաց Ն.Փաշինյանը։