Ձեր վստահելի աղբյուրը

2018 թվականի առաջին կիսամյակում միգրացիոն սալդոն կազմել է -6 հազար 146: Այս մասին այսօր լրագրողների հետ հանդիպման ժամանակ ասաց  ՀՀ տարածքային կառավարման և զարգացման նախարարության Միգրացիոն ծառայության պետ Արմեն Ղազարյանը:

Նրա խոսքով՝  թեև սալդոն ինքնին բացասական է, բայց եթե այս ցուցանիշը համեմատում են նախորդ տարիների ցուցանիշների հետ, ապա տեսնում են, որ դրական միտումն ակնհայտ է:

Արմեն Ղազարյանը նշեց, որ - 6 հազար 146-ը սահմանահատումների ընդհանուր դեպքերի սալդոն է, այսինքն, երբ մեկ անձը մի քանի անգամ է  հատում սահմանը և դա ներառվում է  այս ցուցանիշում:  Իսկ նույնականացված տվյալներով, ըստ նրա, սալդոն կազմում է -5 հազար 204: «Սա  դրական միտում է, քանի որ  2017 թվականի առաջին կիսամյակում նույնականացման տվյալներով՝  միգրացիոն սալդոն կազմել է -30 հազար 853: Այստեղ էական փոփոխությունը երևում է»,- ընդգծեց  նա:

Անդրադառնալով ռեադմիսիայի (հետընդունման) ցուցանիշներին՝ Արմեն Ղազարյանն ասաց, որ ԵՄ-ից  ստացված հայցերի թիվը եղել է 769, որը ներառում է 1529 մարդ: Ըստ նրա՝ 382-ի դեպքում հաստատվել է, որ այդ անձինք ՀՀ քաղաքացիներ են:  «Մենք իրականացնում ենք վերաինտեգրման ծրագրեր: Միգրացիոն ծառայությունում վերադարձողների համար բացել ենք «մեկ պատուհան», որտեղ վերադարձողները կարող են ստանալ ամբողջական տեղեկատվություն, թե ինչ ծրագրերում կարող են ներգրավվել, որ իրենց  վերադարձն ավելի սահուն լինի»,- ասաց նա:

Միգրացիոն ծառայության պետը ներկայացրեց նաև ԵՄ երկրներում Հայաստանից ապաստան հայցողների մասին տվյալներ: Այսպիսով, ըստ Եվրոստատի տվյալների՝ ԵՄ-ի երկրներում, գումարած Իսլանդիայում, Լիխտենշտեյնում, Նորվեգիայում, Շվեյցարիայում 2017 թվականի առաջին կիսամյակում Հայաստանից ապաստան հայցողների թիվը եղել է 3270,  իսկ 2018թ-ի նույն ժամանակահատվածում՝  2490: « Այսինքն՝ սա էական նվազում է: Մենք տեսնում ենք, որ Եվրոպայում Հայաստանից ապաստան հայցողների թիվը էական նվազում է: Եթե այս ցուցանիշը համադրում ենք սահմանահատումների վիճակագրության հետ, ապա տեսնում ենք, որ ունենք դրական միգրացիոն դինամիկա»,-  ընդգծեց Արմեն Ղազարյանը: