Ձեր վստահելի աղբյուրը

«Նոր Ընտրական օրենսգրքի նախագիծը մշակվել է՝ չապահովելով լայն քաղաքական կոնսենսուս՝ այնպես, ինչպես մեզ հորդորում էին եվրոպացի գործընկերները։ Այն մշակվել է՝ կառավարության կողմից չներառելով խորհրդարանական ուժերի մասնակցությունը։ Նախագիծը ենթադրում է բավականին կարդինալ փոփոխություններ, որոնցից հետո՝ ըստ Վենետիկի հանձնաժողովի ռեկոմենդացիների՝ առնվազն 6 ամիս պետք է, որպեսզի ընտրություններ կազմակերպվեն»,- այսօր ԱԺ-ում լրագրողների հետ զրույցում ասաց ՀՀԿ խմբակցության պատգամավոր Արմեն Աշոտյանը։

«Եթե իշխանությունն իրոք ուզում է խաղալ ժողովրդավարական խաղ, ապա պետք է ԸՕ նախագծի լրամշակում արվի հիմա՝ ԱԺ-ում՝ ներառելով խորհրդարանական ուժերին, լինի Վենետիկի հանձնաժողովի փորձաքննություն, հնարավոր ընդունումից հետո հետևողական լինի՝ դնելու այդ վեց ամսվա ժամկետը։ Ես մեկ անգամ ևս բացատրեցի, թե ինչու ենք ասում, որ արտահերթ ընտրությունները պետք կայնանան գալիք մայիսին։ Մայիսը ոչ միայն կառավարության կողմից ծրագրի հաստատման մեկ տարին է, այլ իր ներքո ունի հստակ տրամաբանություն և բովանդակություն։

Խորհրդարանական ձևաչափի համագործակցությունն ավարտվեց այնտեղ, որտեղ խորհրդարանական հանձնաժողովը ձևակերպեց իր մոտեցումները և տվեց կառավարությանը։ Կառավարությունը վերցրեց այդ մոտեցումները, առանց խորհրդարանական ուժերի հետ կոնսուլտացվելու և աշխատելու, գոնե կարող եմ պնդել, որ ՀՀԿ խմբակցության որևէ ներկայացուցիչ չի հրավիրվել լրացուցիչ քննարկումներին, չի մասնակցել բուն նախագծի քննարկումներին ու մշակմանը։ Ակնհայտ է, որ խորհրդարանի կողմից տրված կարծիքը վերցրել են որպես տեղեկանք, որտեղ ուզել՝ ներառել են, որտեղ չեն ուզել՝ չեն ներառել»- նշեց Արմեն Աշոտյանը։

Անդրադառնալով ՀՀ վարչապետ Նիկոլ Փաշինյանի՝ ավելի վաղ արած այն հայտարարությանը, որ ՀՀԿ-ն պետք է արմատախիլ անել երկրից, պատգամավորը այն շատ վտանգավոր որակեց։

«Այս հայտարարության տակ ես չեմ տեսնում ժողովրդավար վարչապետ, չեմ տեսնում երկրի ղեկավարի, որը պատրաստ է լինել բոլորի վարչապետը՝ անկախ քաղաքական տարաձայնություններից։ Նիկոլ Փաշինյանը չի ասել՝ Սերժ Սարգսյանը պետք է հեռանա, Նիկոլ Փաշինյանն ասել է՝ Հանրապետական կուսակցությունը պետք է արմատախիլ արվի»,- շեշտեց նա։

Հարցին՝ ՀՀԿ-ն ո՞ւմ է համարում իրեն գործընկեր ուժ՝ կուսակցության փոխնախագահը շեշտեց՝ մինչև հոկտեմբերի երկուսն իրենք խորհրդարանում որպես ընդդիմություն մենակ են եղել։

«Մենք հարգում ենք «Ծառուկյան» խմբակցության հուշագիրը, իրենց որոշումն է։ Դեռ չգիտեմ՝ ՀՅԴ-ն ունի՞ վերջնական փաստաթուղթ, թե ոչ։ Իրենց ցանկացած որոշումն էլ պատրաստ ենք ընդունել, ինչպես նաև պատրաստ ենք ընդունել մեր այն գործընկերների որոշումը, որ ՀՀԿ խմբակցության անդամ են, սակայն այս օրերին հայտնեցին այլ տեսակետ։ ՀՀԿ խմբակցությունը մնում է Ազգային ժողովում, մնում է իր քաղաքակն տեսակետների մեջ, այն է՝ արտահերթ ընտրություններին՝ այո, հապճեպ ընտրություններին՝ ոչ, ԸՕ բարեփոխումներին՝ այո, ԸՕ-ն «սղղցնելու» փորձերին՝ ոչ, ժողովրդավարությանն՝ այո, սահմանադրականության խախտման ցանկացած փորձին՝  ոչ»,- նշեց Աշոտյանը՝ միաժամանակ հայտնելով, որ դեռ չգիտի՝ արդյոք այլ կարծիք հայտնած գործընկերներին կհեռացնեն խմբակցությունից։ 

Խորհրդարանականն ափսոսանք հայտնեց, որ ՀՀ վարչապետը երկրի օրենսդիր մարմինը համարում է դե ֆակտո լուծարված։

«Դե ֆակտո լուծարված ԱԺ-ն ինչպե՞ս է նրա բերած օրենսգիրքը քննարկելու։ Դե ֆակտո լուծարված ԱԺ-ն ո՞նց է քննարկելու պետական բյուջեն։ Բյուջեն ո՞վ պետք է հաստատի, Ընտրական օրենսգիրքն ո՞վ պետք է քննարկի. դե ֆակտո լուծարված Ազգային ժողո՞վը։ Վերջին տարիներին դեպք չի եղել, որ օրացուցային տարի մտնենք առանց բյուջեի։ Այդ դեպքում թող բյուջե  ընդհանրապես չուղարկեին, ասեին՝ այս ԱԺ-ն լուծարված է, չենք ուղարկելու։ Բայց ինչպես գիտեք, արդեն հաջորդ շաբաթ տարբեր հանձնաժողովներում սկսվում է բյուջեի քննարկումը»,- ասաց Արմեն Աշոտյանը։

Վերջում  պատգամավորն անդրադարձավ ՀՀ վարչապետի հայտարարությանը, որ իրենք ԵԽԽՎ մոնիտորինգի մոտ արդարանալու որևէ բան չունեն։

«Այդ դեպքում ինչո՞ւ են հապճեպ Լենա Նազարյանին գործուղում Ստրասբուրգ։ Նա այսօր մեկնել է Ստրասբուրգ՝ ԵԽԽվ-ում հանդիպումներ ունենալու։ Վարչապետը կարիք չուներ չէ՞ արդարանալու, ուրեմն՝  ինչու է Լենա Նազարյանը գնացել Ստրասբուրգ»,- հարց ուղղեց նա։