Ձեր վստահելի աղբյուրը

«Ցանկանում եմ խորին շնորհակալությունս հայտնել այս հրաշալի երկրի՝ Հայաստանի Հանրապետության վարչապետ Նիկոլ Փաշինյանին և հայ ժողովրդին, այս երկրին, որը ստանձնեց հյուրընկալել Ֆրանկոֆոնիայի միջազգային կազմակերպության 17-րդ գագաթնաժողովը»,- ՖՄԿ գագաթնաժողովում իր ելույթն  այսպես սկսեց Կանադայի վարչապետ Ջասթին Թրյուդոն։

Կանադայի վարչապետը խոսեց նաև աշխարհահռչակ շանսոնյե Շառլ Ազնավուրի մասին։ Նրա խոսքով՝ Հայաստանն այն երկիրն է, որի ժառանգն ու ներկայացուցիչն էր այդ մեծ մարդը։

«Ես չեմ կարող չարտահայտել իմ խորը կարեկցանքը մեծ մարդուն՝ Շառլ Ազնավուրին, ում անչափ սիրում էի։ Բոլորս, ամբողջ ֆրանկոֆոն աշխարհը համախմբվեց և  հարգանքի տուրք մատուցեց Շառլ Ազնավուրին։ Նա մանրամասն տեսնում էր մեր լեզվի բոլոր նրբերանգները , մեր մշակույթների բոլոր նրբությունները։ Ես տեսնում եմ, որ նույն ոգին առկա է նաև այստեղ»,- նշեց Ջասթին Թրյուդոն։

Նա միաժամանակ ասաց՝  բնավ չի նշանակում, որ ֆրանկոֆոն երկրներն ամեն ինչի շուրջ համաձայն են, բայց միասին կարողացել են ստեղծել մի տիրույթ, որտեղ առաջնորդվում են իրար հանդեպ հարգանքով, մի տիրույթ, որտեղ պետությունները կարող են զարգանալ, լսել իրար և այդ ամենը ֆրանսերենով։

«Ձեր երկիրն ունենա 90 մլն կամ 9 մլն բնակչություն, դուք լիիրավ անդամ եք մեր կազմակերպության»,- ասաց նա։

Նրա խոսքով՝ ֆրանկոֆոն երկրները պետք է համախմբվեն ոչ միայն իրենց ճառերի շուրջ, այլ ապագայի շուրջ, որը ցանկանում են կառուցել։ 

«Շատ քաղաքացիներ իրենց հեռու են զգում գլոբալիզացիայից: Կան շատ բնիկ ժողովուրդներ,  որոնք նույնպես իրենց մոռացված են զգում ժամանակակից աշխարհի խոստումներից: Բայց  ոչ մի երկիր չի կարող գրանցել հաջողություններ առանց բոլորի մասնակցության՝ անկախ նրանց կրոնական ու ազգային պատկանելությունից: Ֆրանկոֆոն երկրները լավագույնն են դիրքավորված այս արժեքների առաջամարտիկներ լինելու համար: 10 ամենաարագ զարգացող պետություններից հինգը ֆրանկոֆոն պետություններ են»,- նշեց Կանադայի վարչապետը։

Ջասթին Թրյուդոն ասաց, որ Աֆրիկան այսօր հանդիսանում է Ֆրանկոֆոնիայի շարժիչը՝ հաշվի առնելով բնակչությունը և զարգացման տեմպը:

«Մեր պատասխանատվությունն է՝ մեր երիտասարդությանը ընձեռել  հավասար հնարավորություններ սովորելու ու հաջողություններ գրանցելու: Ինչպես գիտեք Կանադան ակտիվորեն մասնակցում է Մալիում ՄԱԿ-ի գործառույթներին:  Այսօր կարող եմ ուրախությամբ արձանագրել, որ Մալիում գրանցվում են հաջողություններ կանանց իրավունքների հարցում, այնտեղ նվազում է խտրականությունը: Սա մեր գործառույթներից ընդամենը մեկն է Աֆրիկայում: Մենք աֆրիկյան մայրցամաքի համար ցանկանում ենք լինել երկարաժամկետ գործընկեր»,- ընդգծեց Ջասթին Տրյուդոն՝ հավելելով, որ  Կանադան կշարունակի պաշտպանել Ֆրակոֆոնիայի հիմնարար արժեքները, որոնք մարդու իրավունքներն են։

Իր ելույթի վերջում Կանադայի վարչապետն ասաց. «Այս գագաթնաժողովը կայանում է շատ կարևոր մի ժամանակաշրջանում, երբ պարտավոր ենք վերաիմաստավորել միասին ապրելու  կարգախոսը, քանի որ մարտահրավերները կարող ենք հաղթահարել միայն միասին ապրելու կարգախոսի տիրույթում»։