Ձեր վստահելի աղբյուրը

«Սուրբ Գրիգոր Լուսավորիչ» ԲԿ-ում 34 տարեկան քաղաքացու մահվան փաստով հարուցվել է քրեական գործ Քրեական օրենսգրքի 130 հոդվածի 2-րդ մասի հատկանիշներով։ Այս մասին Panorama.am-ին հայտնեցին Քննչական կոմիտեից։

«Դիակի դատաբժշկական փորձաքննություն նշանակված է»,-հայտնեցին կոմիտեից։

Քրեական օրենսգրքի  130 հոդվածի 2-րդ մասը սահմանում է. «Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը` դրանց նկատմամբ անփույթ կամ անբարեխիղճ վերաբերմունքի հետևանքով,
որն անզգուշությամբ առաջացրել է բուժվող հիվանդի մահ կամ մարդու իմունային անբավարարության վարակի հարուցիչով վարակում պատժվում է ազատազրկմամբ` երկուսից վեց տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով կամ առանց դրա»։

Ըստ Shamshyan.com-ի՝ սեպտեմբերի 27-ին ոստիկանության Նոր Նորքի բաժին է ահազանգել Երևան քաղաքի Նորք Մարաշ վարչական շրջանի բնակիչ՝ 59-ամյա Մ. Հ.-ն, ով հայտնել է, որ «Սուրբ Գրիգոր Լուսավորիչ» բժշկական կենտրոնում բուժվող իր որդին՝ նույն վարչական շրջանի բնակիչ, 34-ամյա Ս. Դավթյանը, մի քանի օր է, բժիշկների անփույթ աշխատանքի պատճառով կոմայի մեջ է։

«Մ. Հովհաննիսյանը հայտնել է նաև, որ բժիշկներն իրենց մեղքերը կոծկելու նպատակով որդու երակին արյունը մաքրող սարք են միացրել։

Հիվանդանոց մեկնած ոստիկանության Նոր Նորքի բաժնի օպերատիվ խմբին, հետաքննչական բաժանմունքի հետաքննիչին հիվանդի հարազատները հայտնել են, որ Ս. Դավթյանը սեպտեմբերի 22-ին ողնաշարի սուր ցավերով տեղափոխվել է նշված բժշկական կենտրոն և ընդունվել ստացիոնար բուժման, սակայն վերակենդանացման բաժանմունքի բժիշկների սխալ բուժման հետևանքով սեպտեմբերի 25-ից Ս. Դավթյանը գտնվում է կոմայի մեջ։

Ըստ աղբյուրի՝ երեկ, հոկտեմբերի 11-ին, ժամը 21։50-ի սահմաններում Ս. Դավթյանը հիվանդանոցի վերակենդանացման բաժանմունքում մահացել է։ Հարազատները ոստիկաններին հայտնել են նաև, որ նա մահացել է բժիշկների մեղքով»,-գրել է աղբյուրը։