Ձեր վստահելի աղբյուրը

«Ես պաշտոնը ստանձնել եմ այսօր և մինչ օրս որպես քաղաքապետ ոչ մի որոշում չէի կարող կայացնել»,- այս մասին այսօր լրագրողների հետ զրույցում ասաց Երևանի նորանշանակ քաղաքապետ Հայկ Մարությանն՝ անդրադառնալով մամուլում հրապարակված այն լուրերին, թե նա կրճատել է Երևանի 2800-ամյակին նվիրված միջոցառումների ծախսերը:

Նա միաժամանակ նշեց, որ Էրեբունի-Երևանի տոնակատարությունների վերաբերյալ հորդորել է որոշակի ծախսեր կրճատել՝ որոշ միջոցառումներ համարելով ոչ նպատակային այդ տոնի համար:

«Վստահաբար կարող եմ ասել, որ դրանից տոնը չի տուժել, Երևանցիների համար լինելու է շատ շքեղ տոնակատարություն»,- ընդգծեց Հայկ Մարությանը՝ հավելելով, որ դրանց արդյունքում եղել է մեծ տնտեսում քաղաքի համար. «Հաշվի առնելով, որ դեմը ձմեռ է և բավականին մեծ ծախսեր ունենք անելու»:

Հարցին՝ դա իր առաջին որոշո՞ւմն է քաղաքապետի պաշտոնում, նշեց, որ չի կարող ասել, բայց իր բոլոր որոշումները պետք է հիմնված լինեն արդարության վրա:

Անդրադառնալով մեկ այլ հարցի՝ արդյոք քաղաքապետի պաշտոնում կաշխատի նախկին կադրերի հետ, Հայկ Մարությանը պատասխանեց.  «Շատ կարևոր է, որ բոլոր այն մասնագետները, որոնք ունեն բարձր մասնագիտական հմտություններ և պատրաստ են Նոր Հայաստանի օրենքներով ծառայել քաղաքին, Երևանի բնակիչներին, պատրաստ են նոր կերպով աշխատել, չունեն օրենքի հետ որևէ խնդիրներ, այո՛, մենք կարող ենք իրենց հետ աշխատել: Դա չի նշանակում, որ չեն լինելու կրճատումներ, պաշտոնանկություններ, բայց մենք պետք է պրոֆեսիոնալ մարդկանց գնահատենք, որոնք անցել են մեծ ճանապարհ, ունեն մեծ փորձ»:

Երևանի քաղաքապետը լրագրողներին վստահեցրեց, որ առաջիկայում տեղի ունեցող փոփոխությունների մասին առաջինը կիմանան լրագրողները. «Դուք կիմանաք թե նոր անունների մասին, թե հին անունների, որոնք մնալու են»:

Լրագրողները նաև հետաքրքրվեցին, թե արդյոք քաղաքապետի երդմնակալության արարողությանը Ազգային ժողովից հրավիրվածներ եղել են, Հայկ Մարությանն ասաց, որ իր մոտեցումը հետևյալն է՝  պետք է հարգեն բոլոր ինստիտուտները և չանձնավորեն նրանց:

«Բոլոր նախկին քաղաքապետերին, ԱԺ նախագահին, տեղակալներին, խմբակցությունների ղեկավարներին, հանձնաժողովների նախագահներին, վարչական շրջանների ղեկավարներին՝ անկախ նրանց կուսակցական պատկանելությունից, ուղարկվել է հրավեր»,- ասաց քաղաքապետը:

Հայկ Մարությանն ասաց չի կարող ասել, թե հրավիրվածներն ինչու չեն մասնակցել երդման արարողությանը: 

«Միգուցե  քաղաքում չեն, միգուցե չեն ցանկացել գալ, միգուցե այլ խնդիրներ կան: Իրոք չգիտեմ, վստահ եմ, որ մի պատճառ կա, դա կարող եք իրենցից հարցնել»,- նշեց նա: