Բոլթոնի այցով կարող ենք ուղիղ կապ հաստատել Սպիտակ տան հետ. Սուրեն Սարգսյան
Հայտնի է, որ ԱՄՆ նախագահի ազգային անվտանգության հարցերով խորհրդական Ջոն Բոլթոնը հոկտեմբերի 20-ին կժամանի տարածաշրջան։ Նա այցի շրջանակում կլինի նաև Հայաստանում:
Ի՞նչ կարող է մեր երկիրը սպասել ամերիկացի բարձրաստիճան պաշտոնյայի այցից, թեմայի շուրջ Panorama.am-ի թղթակիցը խոսեց Միջազգային իրավունքի և միջազգային հարաբերությունների մասնագետ Սուրեն Սարգսյանի հետ։
Նա նախ նկատեց, որ Ջոն Բոլթոնը Վաշինգտոնում ամենաազդեցիկ մարդկանցից է և լուրջ ազդեցություն ունի ԱՄՆ նախագահ Դոնալդ Թրամփի վրա։
«Նրա՝ Հայաստան այցով մենք կարող ենք ուղիղ կապ հաստատել Սպիտակ տան հետ, մի բան, որ Թրամփի՝ Միացյալ նահանգների նախագահ ընտրվելուց հետո մեզ չէր հաջողվում։ Դոնալդ Թրամփի՝ նախագահի պաշտոնը ստանձնելուց հետո մեզ՝ որպես պետության, մեր լոբբիստներին, համայնքին, բավականին բարդ էր կապեր հաստատել Սպիտակ տան հետ, սա մեր ղեկավարության համար լավ հնարավորություն է»,- ասաց Սուրեն Սարգսյանը։
Միջազգային հարաբերությունների մասնագետը շեշտեց՝ Բոլթոնի այցի ընթացքում Հայաստանը կարող է իր օժանդակությունն առաջարկել Միացյալ նահանգներին՝ Աֆղանստանում և ԱՄՆ-ի կողմից իրականացվող տարբեր խաղաղասիրական առաքելություններում մասնակցություն ունենալու հարցով։
«Մենք գիտենք, որ Միացյալ նահանգները մեզ մշտապես շնորհակալություն են հայտնում տարբեր պետություններում խաղաղապահ առաքելությունների համար։ ԱՄՆ-ը նաև շնորհակալություն է հայտնում Սիրիայից եկած փախստականներին Հայաստանում տեղավորելու համար։ Այնպես որ, այս երկու հարցերը կարող են օրակարգային լինել։ Հայաստանն իրոք աջակցել է սիրիահայ մեր բարեկամներին։ Կարծում եմ՝ Միացյալ նահանգները մեզ կարող են նաև այս առումով օգնել, այս հարցը նույպես կարելի է քննարկել»,- ասաց Սուրեն Սարգսյանը։
Ճշգրտող հարցին՝ ԱՄՆ-ից հատկապես ի՞նչ ակնկալիքներ կարող է ունենալ Հայաստանը վերոնշյալ երկու հարցերում լուրջ ներդրում ունենալուց հետո, վերլուծաբանն օրինակ բերեց հարևան Թուրքիայի փորձը։
«Այդ երկիրը մի քանի միլիարդի աջակցություն է ստացել տարբեր պետություններից, Եվրոպական միությունից, ՄԱԿ-ից՝ իր տարածքում սիրիացի փախստականներին ապաստան տալով։ Կարծում եմ եմ՝ Հայաստանը ևս կարող է Միացյալ նահանգներից այս նպատակով աջակցություն խնդրել՝ էլ ավելի բարելավելու Հայաստանում ապրող սիրիահայերի վիճակը։ Իհարկե, Հայաստանը նրանց նկատմամբ, այսպես թե այնպես, բարոյական պատասխանատվություն է կրում, սակայն եթե լինի լրացուցիչ օգնություն, դա միայն դրականորեն կազդի փախստականների բարեկեցության վրա»,- ամփոփեց նա։
Հարակից հրապարակումներ`
Լրահոս
Տեսանյութեր
Վ.Հակոբյան. Ռուսաստանի հետախուզությունն ասում է՝ գիտենք, ինչ փողեր են գալիս, ում գրպաններն են մտնում
