Ձեր վստահելի աղբյուրը

Հոկտեմբերը կրծքագեղձի քաղցկեղի դեմ պայքարի կամ «Վարդագույն ժապավենի» ամիսն է: Ամեն տարի հոկտեմբերին աշխարհի տարբեր երկրներում անցկացվում են միջոցառումներ կրծքագեղձի քաղցկեղի խնդրի նկատմամբ ուշադրության գրավման,  տեղեկացվածության բարձրացման, վաղ հայտնաբերման ու բուժման նպատակով:

Հայ-Ամերիկյան առողջության կենտրոնի ճառագայթային ախտորոշման բաժանմունքի վարիչ Հովհաննես Վարդևանյանն այսօր լրագրողների հետ հանդիպման ժամանակ ասաց, որ ինչպես ամբողջ աշխարհում, այնպես էլ Հայաստանում  վերջին տարիներին նկատվում է կրծքագեղձի քաղցկեղով հիվանդացության աճ: Սակայն, ըստ նրա, կրծքագեղձի քաղցկեղը դատավճիռ չէ, եթե ախտորոշվում է ժամանակին և ճիշտ:

«Կրծքագեղձի քաղցկեղը բուժելի հիվանդություն է, կարելի է ասել՝ ընթացքը բարի է, երբ հայտնաբերվում է վաղ փուլում: Այսինքն՝ պետք չէ սպասել մինչև այն զարգանա, հետո նոր միայն դիմել բժշկի: Հարկավոր է հետազոտությունների արդյունքում հայտնաբերել այդ խնդիրը նախակլինիկական շրջանում»- ասաց ռադիոլոգը:

Ըստ նրա՝  որոշ կանանց թվում է, որ եթե իրենք իրենց կրծքում ոչ մի գոյացություն չեն շոշափում, ապա խնդիր չունեն, բայց  փոքր ուռուցքները կարելի է հայտնաբերել միայն ուլտրաձայնային կամ մամոգրաֆիկ հետազոտության ժամանակ: Ուստի, ըստ մասնագետի, պետք է տարին գոնե մեկ անգամ հետազոտվել, քանի որ վաղ հայտնաբերված քաղցկեղը կարելի է բուժել. «Իմ խնդրանքը, հորդորն այն է, որ կանայք պարբերաբար հետազոտվեն»:

Հովհաննես Վարդևանյանը հայտնեց, որ 35-40 տարեկան կանայք պարտադիր պետք է մամոգրաֆիկ հետազոտություն անցնեն, 40 տարեկանից հետո կանայք  պետք է երկու տարին մեկ անգամ մամոգրաֆիկ հետազոտություն, իսկ 50-ից հետո՝ տարին մեկ անգամ, որպեսզի վաղ շրջանում հայտնաբերեն քաղցկեղը:

Հովհաննես Վարդևանյանի խոսքով՝  վերջին տարիներին կանայք սկսել են ավելի ուշադիր վերաբերվել իրենց առողջությանը, ավելի հաճախ դիմել բժշկի՝ նույնիսկ բողոքի բացակայության դեպքում: Սակայն, ըստ նրա, քիչ չեն նաև այն դեպքերը, երբ դիմում են այն ժամանակ, երբ քաղցկեղն արդեն խորացած փուլում է:

Մասնագետը կարևորեց սկրինինգային ծրագրերը, որոնք գոյություն ունեն աշխարհի բազմաթիվ երկրներում, բայց Հայաստանում դեռ նման ծրագիր չկա. «Առողջ հասարակություն ունենալու համար պետք է պետությունը կրծքագեղձի քաղցկեղի սքրինինգային հետազոտության ծրագիր իրականացնի»: