Մենք քննարկեցինք նախագիծը և ունենք որոշակի փոխզիջումային տարբերակ. Արարատ Միրզոյան

Քաղաքական 19:14 16/10/2018 Հայաստան

Մենք քննարկեցինք նախագիծը և ունենք որոշակի փոխզիջումային տարբերակ. Արարատ Միրզոյան

ԱԺ-ում քիչ առաջ ավարտվել է «Ծառուկյան» խմբակցության անդամների և ՀՀ փոխվարչապետ Արարատ Միրզոյանի՝ Ընտրական նոր օրենսգրքի նախագծի շուրջ քննարկումը:

«Մենք քննարկեցինք նախագիծը և ունենք որոշակի փոխզիջումային տարբերակ, դա հետևյալն է. չորրորդ քաղաքական ուժը լինի ԱԺ-ում, եթե այդ ուժը հավաքել է առնվազն 2 տոկոս քվե: Սա պետք է քննարկենք նաև մյուս քաղաքական ուժերի, մյուս խմբակցությունների հետ ևս: ՀՀԿ-ի հետ երկու տոկոսի հարցը չենք քննարկել, մի քանի այլ հարցեր ևս նորից կքննարկենք ՀՀԿ-ի հետ»,-ասաց փոխվարչապետը։

Դիտարկմանը, թե ՀՀԿ-ի հանդիպումից հետո Վիգեն Սարգսյանը նշել է, որ Կառավարությունն այս հապճեպությամբ ԸՕ նախագիծը բերում է, որ այն չանցնի, և դա դարձնի քաղաքական հերթական հիստերիայի առարկա, Արարատ Միրզոյանն պատասխանեց.

«Ես բոլորովին համաձայն չեմ Վիգեն Սարգսյանի ձևակերպման հետ, և մի քանի անգամ էլ մեր քննարկման ժամանակ հայտնել եմ, որ համաձայն չեմ իր եզրահանգման հետ: Իմ կարծիքով, Վիգեն Սարգսյանը սխալ եզրահանգում է արել, ու իմ տպավորությամբ՝ ՀՀԿ խմբակցության ոչ բոլոր անդամներն էին կիսում նրա եզրահանգումը»:

Արարատ Միզոյանը նկատեց, որ «Ծառուկյան» խմբակցությունը մեծ հաշվով կիսում է իրենց մոտեցումները:

««Ծառուկյան» խմբակցության հետ քննարկմանն ունեինք մեկ սկզբունքային կետ: Դա վերաբերում էր խորհրդարանում չորս խմբակցությունների անցնելուն: Մենք քննարկեցինք և ունենք որոշակի փոխզիջումային լուծում: Չորրորդ ուժը ներկայացված կլինի ԱԺ-ում, եթե նա հավաքի առնվազն 2 տոկոս ձայն»,-ասաց փոխվարչապետը՝ հավելելով, որ այս հարցը դեռ պետք է քննարկեն մյուս խմբակցությունների հետ:

Ինչպես փոխվարչապետը նշեց` մեկ կետի հետ կապված ոչինչ չէին կարող անել, որովհետև սահմանադրության պահանջն այլ էր: Միրզոյանը նկատեց` այս խմբակցությունը մեծ հաշվով կիսում է իրենց մոտեցումները:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: