Ձեր վստահելի աղբյուրը

«Օրենսդրական փաթեթի բարեփոխումների կարևորագույն նպատակը Հայաստանում ժողովրդավարական ընտրական ինստիտուտների կայացումն է»,-կառավարության՝ ընթացող արտահերթ նիստում հայտարարեց արդարադատության նախարար Արտակ Զեյնալյանը ներկայացնելով ընտրական բարեփոխումներին վերաբերող օրենսդրական փաթեթը։

Նրա խոսքով, փոփոխություններով, ի թիվս այլի, առաջարկվում է վերացնել թեկնածուների տարածքային ցուցակները, անցնել պարզ համամասնական ընտրակարգի։

«Կոալիցիաների ձևավորման սահմանափակումների վերացում և ժամկետների ընդլայնում՝ վեց օրից դարձնելով տասն օր։ Կուսակցական բազմակարծության ապահովման նպատակով ընտրվելու նվազագույն շեմի իջեցում՝ կուսակցությունների դեպքում ներկա 5 տոկոսի փոխարեն 4 տոկոս, իսկ կուսակցությունների դաշինքների համար՝ ներկայիս 7 տոկոսի փոխարեն 6 տոկոս»,-առաջարկվող փոփոխություններն ու լրացումները շարունակեց թվարկել Զեյնալյանը։

Առաջարկվում է նվազեցնել նաև ընտրագրավի չափը, գործողը սահմանում է նվազագույն աշխատավարձի տասնհազարապատիկը, առաջարկվում է դարձնել 7500-ապատիկը։  Ընտրագրավը կվերադարձվի 2 և ավելի տոկոս քվե ստացած քաղաքական ուժերին, այժմ սահմանված է 4 տոկոս։

«Ներկայում գործող երեքի փոխարեն նվազագույնը չորս կուսակցությունների, կուսակցությունների դաշինքի մանդատների բախշմանը մասնակցության ապահովում։ Կանանց ներկայացվածության քվետայի բարելավում, առնավզն 30 տոկոս՝ գործող 25-ի փոխարեն։ Առաջարկվում է նաև բոնուսային համակարգի վերացում Գյումրու, Վանաձորի ավագանիների ընտրությունների ժամանակ»,-նշեց նախարարը։

Նկատենք, որ փաթեթում ներառված են «Հայաստանի Հանրապետության ընտրական օրենսգիրք» Հայաստանի Հանրապետության սահմանադրական օրենքում փոփոխություններ և լրացումներ կատարելու մասին» Հայաստանի Հանրապետության սահմանադրական օրենքի, «Հանրաքվեի մասին» Հայաստանի Հանրապետության սահմանադրական օրենքում փոփոխություն կատարելու մասին» Հայաստանի Հանրապետության սահմանադրական օրենքի, «Վարչական իրավախախտումների վերաբերյալ Հայաստանի Հանրապետության օրենսգրքում լրացումներ կատարելու մասին» և «Պաշտպանության մասին» Հայաստանի Հանրապետության օրենքում լրացում կատարելու մասին» Հայաստանի Հանրապետության օրենքների նախագծերը։

Նրա ներկայացմամբ, սահմանվել են Ընտրողների ցուցակների կազմման և վարման գործընթացի արդյունավետության բարձրացումն ապահովող մեխանիզմներ.

. Սահմանափակել վավերականության ժամկետը լրացած անձանց անձը հաստատող փաստաթղթերով քվեարկելու իրավունքը՝ ապահովելով վավեր անձնագրերով Հայաստանում գտնվող բոլոր ընտրողների քվեարկելու իրավունքը  և ցուցակներում թողնելով առնվազն վերջին մի քանի տարվա ընթացքում անձը հաստատող վավեր փաստաթղթերով ընտրողներին
. Նախատեսվել է մեխանիզմ դատարանի կողմից անգործունակ ճանաչված անձանց ընտրողների ցուցակից հանելու համար։
Նախատեսվում է ընտրողների իրազեկվածության բարձրացում մասնավորապես՝ Էապես ավելացվել է հանրային ռադիոյով և հեռուստատեսությամբ անվճար եթերաժամանակը , քվեարկության գործընթացի մատչելիության ապահովում, որը ենթադրում է տեղաշարժման դժվարություններ ունեցող ընտրողներին հնարավորություն տալ ժամանակավոր հաշվառվել տեղաշարժման համար մատչելի, գտնվելու վայրին մոտակա տեղամասային կենտրոնում։

Զեյնալյանը նշեց՝ սահմանվել է, որ զինծառայողների անմիջական և ոչ անմիջական պետերին ինչպես նաև կոչումով բարձր սպաներին արգելվում է զինծառայողների քվեարկության ժամանակ քվեարկության սենյակում գտնվել կամ նրանց հետ միաժամանակ նույն պահին նույն քվեարկության սենյակում քվեարկել։

Առաջարկվող փոփոխություններով նախատեսվում է նաև ընտրական գործընթացների նկատմամբ վերահսկողության հնարավորությունների բարձրացում, սահմանվել է միջազգային դիտորդական կազմակերպություններին հրավեր ուղարկելու ընթացակարգ, ամրագրվել է տեղական դիտորդական կազմակերպությունների կողմից 3-ամսյա ժամկետում իրենց զեկույցները հրապարակման համար ԿԸՀ ներկայացնելու պահանջ, սահմանվել է,  որ ԿԸՀ-ն մերժում է հավատարմագրել այն դիտորդներին, որոնց ղեկավար մարմնի կազմում ընդգրկված անձը ընտրության մասնակցող որևէ կուսակցության ցուցակում է ընդգրկված։

Վարչապետ Նիկոլ Փաշինյանը նկատեց՝ առաջարկված բոլոր փոփոխությունները պարզեցման ուղղությամբ են, և չկա որևէ բան, որի համար պետք է հատուկ դասընթաց կազմակերպվի։

Քննարկումներից, հարց ու պատասխանից հետո գործադիրը հաստատեց Ընտրական օրենսգրքում առաջարկվող փոփոխությունների ու լրացումների նախագիծն ու օրենսդրական փաթեթը։