Ձեր վստահելի աղբյուրը

«Սա ուշացած, ձևական և թերի քննարկում է»,- ԱԺ-ում Ընտրական օրենսգրքի շուրջ ՀՀ փոխվարչապետ Արարատ Միրզոյանի հետ քննարկումից հետո ասաց ՀՀԿ ներկայացուցիչ Վիգեն Սարգսյանը։

«Ես ցավով եմ արձանագրում, որ կառավարական հանձնաժողովը այդպես էլ ինտենսիվ չաշխատեց խորհրդարանում չորս ֆրակցիաների կողմից ստեղծված աշխատանքային խմբի հետ։ Ավելին, այդ խմբի տված առաջարկները, որոնց մեջ կային փոփոխություններ,  այս նախագծում հաշվի չեն առնվել։ Երկրորդ մեծ խնդիրը այս քննարկման ոճի մեծ հետնահանջն էր՝ նախորդ քննարկման հետ համեմատած։

Երրորդ, մենք այսօր իմացանք, որ Վենետիկի հանջնաժողով նախագիծն օրերս է ուղարկվել, այն էլ ոչ վերջին տարբերակը, որովհետև այն այսօր մեկ անց կես ենք ստացել։ Պարոն Միրզոյանն ուղիղ ասաց, որ վստահ է՝ չեն հասցնելու ստանան պատասխան։ Դա անարգանք է հանձնաժողովի նկատմամբ, ավելի հեշտ էր ուղղակի չուղարկել»,- ասաց Վիգեն Սարգսյանը։

Հանրապետական գործչի խոսքով, այն հապճեպությունը, որ կա իշխանության գործողություններում, պայմանավորված է մեկ հանգամանքով. այսօր գործադիր իշխանություն ունեցող քաղաքական ուժը համարում է, որ իր համար նպաստավոր պայմաններ են ընտրություններ անցկացնելու համար, ինչը, սակայն, վնասում է ժողովրդավարությանը։

«Այս օրենսգիրքը չի արտացոլում կառավարության ծրագրի խոստումները։ Կառավարության ծրագիրը, որը բերվեց ԱԺ, կոնկրետ խոստումներ գրեթե չուներ։ Դրա բուն տեքստում մատների վրա կարելի է հաշվել այն բաները, որոնք Փաշինյանը խոսք էր տալիս։ Դա վերաբերում էր կրկնաքվեարկությունները բացառելու նպատակով երկրով մեկ միասնական համակարգ ներդնելուն, դռնեդուռ քաղաքականությամբ ցուցակները մաքրելուն և տեխնիկական նոր միջոցներ ներդնելուն։ Այս երեք կետերից ոչ մեկն այս օրենսգրքով կատարված չէ»,- նշեց Սարգսյանը։

ՀՀԿ ներկայացուցիչը նշեց, որ դեռ պետք է  քննարկում ունենան՝ որոշելու կողմ թե դեմ են քվեարկում նախագծին, քննարկման ենթակա է նաև ընտրություններին մասնակցել-չմասնակցելու հարցը։

«Ես ավելի քան  վստահ եմ, որ կուսակցությունները ստեղծվում են իշխանության գալու, ընդդիմություն դառնալու, իշխանությունը կորցնելու, կրկին պայքարելու համար։ Այն կուակցությունը, որը իշխանությունը կորցնելուց հետո սրբվում-գնում է, արկածախնդիր ուժ է»,- ասաց նա։

Վիգեն Սարգսայանը նշեց՝ ինքը համոզմունք ուներ, որ իշխանությունը հապճեպությամբ բերում է ԸՕ նախագիծը, որպեսզի այն չանցնի և նա դա դարձնի քաղաքական հիստերիայի և քարոզչության հերթական առարկա։

«Ինձ մոտ պինդ տպավորություն կա, որ կառավարությունը ուզում է այս նախագիծը բերելով՝ կատարած լինի իր նախընտրական խոստումը, հետո ձեռքերը լվանա և ասի՝ ես բերեցի, խորհրդարանը չընդունեց»,- ասաց Սարգսյանը։