Ձեր վստահելի աղբյուրը

«Նոր Հայաստանն իր հետ բերել է նոր իրողություններ, և այն մարդիկ,  ովքեր կարողանում են տեղավորվել այդ իրողություններում,  մեզ հետ երկար ճանապարհ ունեն  անցնելու», - այս մասին նշել է ՀՀ տարածքային կառավարման և զարգացման նախարար Սուրեն Պապիկյանը՝ այսօր Սյունիքի մարզում մարզպետարանի աշխատակիցներին, հանրապետական գործադիր մարմինների տարածքային կառույցների ներկայացուցիչներին  ներկայացրելով նորանշանակ մարզպետ Հունան Պողոսյանին։

Նախարարության մամուլի ծառայության փոխանցմամբ՝ նորանշանակ մարզպետ Հունան Պողոսյանը շնորհակալություն է հայտնել ՀՀ վարչապետին, կառավարությանը, տարածքային կառավարման և  զարգացման նախարարին`  մարզի ղեկավարումն իրեն վստահելու համար։

Ընդգծելով, որ նախկինում էլ իր աշխատանքի բերումով առնչություն է ունեցել մարզի և  նրա խնդիրների հետ՝ մարզպետը հորդորել է ներկաներին վստահել իրեն և հավաստիացրել, որ մարզում հաջողություններ կունենան։

Նշվում է նաև, որ մինչև  մարզպետարանում նախատեսված հանդիպումը,  նախարար  Սուրեն Պապիկյանը, մարզպետ Հունան Պողոսյանն ու ճանաչողական այցով Կապանում գտնվող ԱԱԾ տնօրեն, Հայաստանի ֆուտբոլի ֆեդերացիայի նախագահ Արթուր Վանեցյանն այցելել են Կապանի քաղաքային մարզադաշտ, ծանոթացել այն խնդիրներին, որոնց պատճառով «Գանձասար-Կապան» ֆուտբոլային ակումբն այստեղ հանդիպումներ չի ունենում: