Ձեր վստահելի աղբյուրը

«Որոշում եմ կայացրել Տիգրան Խաչատրյանին տնտեսական զարգացման և ներդրումների նախարար և Գեղամ Գևորգյանին գյուղատնտեսության նախարար նշանակելու մասին»,-այս մասին հայտարարեց վարչապետ Նիկոլ Փաշինյանը քիչ առաջ մեկնարկած կառավարության նիստում։

Նկատենք, որ նախարարներ նշանակելու վերաբերյալ հրամանագրերն արդեն ստորագրել է ՀՀ նախագահ Արմեն Սարգսյանը։ Փոխվարչապետ Տիգրան Ավինյանն այդ մասին հուշեց վարչապետին։

«Հա, ես ուղղակի տեղյակ չէի, որ հրամանագիրը ստորագրվել է նախագահի կողմից, այնպես որ պարոն Խաչատրյանին ու պարոն Գևորգյանին շնորհավորում եմ դե յուրե ու արդեն վերջնականապես նախարար նշանակվելու կապակցությամբ»,-ասաց Փաշինյանը։

Նա նաև նշեց՝ այսօր կարևոր օր է, Հայաստանի Հանրապետությունը թևակոխում է մի նոր պատմական շրջափուլ։

«Դրա հիմնական իմաստը կարող ենք ձևակերպել հետևյալ կերպ՝ այս շրջափուլի արդյունքներով մենք պետք է ավարտին հասցնենք գարնանը Հայաստանում տեղի ունեցած ոչ բռնի, թավշյա, ժողովրդական հեղափոխությունը։ Բայց այդ մասին ես ավելի կոնկրետ հայտարարությամբ հանդես կգամ այսօր երեկոյան»,-արտահերթ նիստում հայտարարեց կառավարության ղեկավարը։