Ձեր վստահելի աղբյուրը

«Վստահ եմ, որ Նիկոլ Փաշինյանի հրաժարականից հետո դավադրություն տեղի չի ունենա, որովհետև, կարծում եմ, վերջին ժամանակների «դավադրություններն» իրենց հետևանքերով մեր գործընկերներին զերծ կպահեն դրանից»,- այսօր ԱԺ-ում լրագրողների հետ զրույցում ասաց «Ելք» խմբակցության պատգամավոր Ալեն Սիմոնյանը։

Հարցին՝  վարչապետը հրաժարականով հանդես է գալու երեկոյա՞ն, Ալեն Սիմոնյանը պատասխանեց՝ ժամանակագրական տվյալներից դատելով՝ ինքը ենթադրում է, որ երեկոյան հայտարարությունը, հնարավոր է, լինի հրաժարականի մասին հայտարարություն։

«Օրը դեռ ավարտված չէ, և վարչապետն ինչպես միշտ իր խոսքին հավատարիմ կմնա, և շուտով կիմանանք՝ պարոն Փաշինյանը հրաժարական տաիս է, թե ոչ»,- ասաց պատգամավորը։

Հարցին՝ իրենք այս պահին դիտարկո՞ւմ են առաջիկա խորհրդարանական ընտրություններին դաշինքով մասնակցելու տարբերակը, թե «Քաղաքացիական պայմանագիրը» միայնակ է գնալու ընտրություններին, Ալեն Սիմոնյանը պատասխանեց.«Իմ ունեցած տեղեկություններով և իմ տրամաբանությամբ մենք ընտրություններին պետք է մասնակցենք «Իմ քայլը» դաշինքով։ Թե ով ներգրավված կլինի այդ դաշինքում, չեմ կարող ասել, տեղեկություն չունեմ, որ որևէ ուժ այդ հարցով դիմել է։ ՆՄան առաջարկ, իմ տեղեկություններով, մենք դեռ չենք ստացել։ Մեր ցուցակում կլինեն անկուսակցականներ, շատ կարևոր է, որ լինեն արհեստավարժ մարդիկ»։

Իսկ հնարավո՞ր է, որ ցուցակում նախկին իշխանության ներկայացուցիչներ ընդգրկվեն, հետաքրքրվեցին լրագրողները։

«Այսօր պարոն վարչապետն ասաց, ես էլ կարող եմ կրկնել, որ հների ու նորերի, յուրայինների և ոչ յուրայինների բաժանումներ չենք անելու»,- շեշտեց խորհրդարանականը։
Անդրադառնալով ընտրագրավի և կուսակցությունների ու դաշինքների համար անցողիկ շեմի իջեցմանը՝ Ալեն Սիմոնյանը շեշտեց, որ դա ճիշտ որոշում էր՝ հնարավորություն տալու փոքր կուսակցություններին կայանալ որպես իսկակական քաղաքական ուժ։

Լրագրողները նաև հարց ուղղեցին՝ արդյոք իր քաղաքական ուժի համար նոր Ընտրական օրենսգիրքը գերնպատակ է, ինչին պատգամավորը բացասական պատասխան հնչեցրեց։
«Միանշանակ ոչ։ Ես որևէ խնդիր չեմ տեսնում, որ պատգամավորները որոշեն կողմ չքվեարկել քննարկումների ընթացքում։ Բայց կարծում եմ, որ հենց մնացած ուժերի շահերից է բխում նոր ԸՕ-ն, և նրանք այնուամենայնիվ ողմ կքվեարկեն դրան»,- ամփոփեց Սիմոնյանը՝ շեշտելով, որ հին ԸՕ-ում ռեյտինգային ընտրակարգը բարդություններ է առաջացնում։