Ձեր վստահելի աղբյուրը

«Ֆրանկոֆոն երկրների շատ ներկայացուցիչներ զարմացած են ՀՀ վարչապետի հրաժարականից, որովհետև քաղաքակիրթ աշխարհում հրաժարականը համարվում է ձախողում։ Դժվար է բոլորին բացատրել, որ նախկին իշխանության մեզ թողած Սահմանադրությամբ նոր ընտրությունների անցկացման համար մնում է միայն այս քայլը»,- լրագրողների հետ հանդիպման ժամանակ ասաց ՀՀ ԱԺ արտաքին հարաբերությունների հանձնաժողովի նախկին նախագահ, միջազգային փորձագետ Հովհաննես Իգիթյանը:

«Նիկոլ Փաշինյանը փորձում է ամեն ինչ անել օրենսդրական ճանապարհով, և սա շատ կարևոր է, որովհետև մենք ուզում ենք, որ միջազգային հանրությունը մեր քայլերն ընկալի ոչ միայն որպես հեղափոխություն, այլ այնպես, որ ամեն բան արվում է օրենսդրական դաշտում»,- ասաց նա։

Վերլուծաբանի խոսքով, նշանակություն չունի՝ որ քաղաքական ուժն է  բանավոր, որը գրավոր հայտարարել, որ վարչապետի թեկնածու չի առաջադրի։ Ըստ նրա՝ ակնհայտ է, որ ժողովուրդը չի հանդուրժի պայմանավորվածությունների խախտումը, հեղափոխութունն նոր ալիքով կջնջի այն քաղաքական ուժին, որը կհամարձակվի խախտել նախնական պայմանավորվածությունը։

«Արդեն պարզ է, որ գնում ենք արտահերթ խորհրդարանական ընտրությունների։ Մենք չպետք է մոռանանք, որ այս ընտրություններին Հայաստանը գնում է նախագահական ընտրությունների ֆորմատով, այսինքն՝ ժողովուրդն ուղղակի, թե անուղղակի ընտրելու է երկրի առաջին դեմքին։ Այս ընտրությունների ժամանակ լինելու է ոչ թե էթնիկական, ռեգիոնալ կամ սոցիալական հայցքների ներկայացում, այլ հեղափոխության  շարունակություն»,- նշեց Հովհաննես Իգիթյանը։

Անդրադառնալով Հայաստանում տեղի ունեցած զարգացումների վերաբերյալ միջազգային հանրության դիրքորոշմանը, ապա, փորձագետի խոսքով, մենք մինչ այս պահն ունենք դրական մոտեցում, քանի որ հեղափոխությունը կատարվել է անարյուն ձևով, լեգիտիմության շրջանակներում։

«Ինչ վերաբերում է ՀՀԿ ներկայացուցիչներին, որոնք մեծամասնություն են կազմում ԵԽԽՎ-ի պատգամավորական պատվիրակությունում, ապա նրանք Եվրախորհուրդում Հայաստանի վիճակը փորձում են ներկայացնել որպես համատարած ճնշում նախկին իշխանությունների նկատմամբ, նաև փորձում են արտահերթ ընտրությունները ներկայացնել որպես հապճեպ քայլ, որին պատրաստ չեն քաղաքական ուժերը։ Այստեղ, ես կասեի, մեծ դեմագոգիայի խնդիր կա, որովհետև մեր հասարակությունը պատրաստ է ընտրություններին, մեր հասարակությունը պատրաստ եղավ մեկ ամսում հեղափոխություն անել և հասկանալ՝ ինչն ինչոց է։

Ինչ վերաբերում է  Ընտրական օրենասգրքին, ապա հայտարարությունները, որ չենք հարգում Վենետիկի հանձնաժողովին, ապա հանձնաժողովն այս կամ այն կերպով նայել է փաստաթղթերը և առարկություսններ չունի»,- նշեց բանախոսը։

Փորձագետը շեշտեց՝ առաջիկա երկու շաբաթվա ընթացքում արտառոց զարգացումների չարժե սպասել, տեսականորեն անգամ նման բան պատկերացնելը դժվար է։

Հովհաննես Իգիթյանը կարծիք հայտնեց, որ խորհրդարան անկասկած անցնելու է  վարչապետի ղեկավարած ուժը, ԱԺ-ում հայտնվելու են նաև ԲՀԿ-ն ու ՀՅԴ-ն։ Ինչ վերաբերում է ՀՀԿ-ին, ապա քաղաքական այդ ուժը վերջին շրջանում փորձում է ինքնամաքրվել։

«Ինչքան գիտեմ՝ այնտեղ կա երկու կարծիք։ Մեկը ապակողմնորոշվածներն են, երկրորդը ոչ վարկաբեկված, կոռուպցիայի մեջ չթաթախված խումբը, որը ցուցակի երիտասարդ ղեկավարով կարող է մասնակցել ընտրություններին։ Ամեն դեպքում, մինչ այժմ ՀՀԿ-ն բացատրություն չի տվել թե ուր են այն 850 հազար ձայները, և որ իրենք ունեն լայնածավալ աջակցություն։ Այդ ձայները ընտրակաշառքով և վարչական լծակներ գործադրելով են ստացվել։ Էլ չեմ ասում, որ բանակը հրամայական ձևով բերվում էր։ Ինձ թվում է՝ այս անգամ նման բան չի լինելու»,- ամփոփեց բանախոսը։