Ձեր վստահելի աղբյուրը

Այս տարվա ութ ամիսներին  Հայաստանում կոնյակի, գինու, օղու ու վիսկիի արտադրության ծավալները զգալի նվազել են։ Փոխարենը ալկոհոլային խմիչքների շուկայում աճել է գարեջրի, շամպայնի արտադրությունը։

Ինչպես Panorama.am-ը տեղեկանում է ՀՀ վիճակագրական կոմիտեից,  2018 թվականի հունվար-օգոստոսին Հայաստանում արտադրվել է 17 մլն 35.8 հազար լիտր կոնյակ, ինչը նախորդ տարվա նույն ժամանակահատվածի համեմատ նվազել է 7.6%-ով:  Ըստ վիճակագրության՝  2017 թ-ի նույն ժամանակահատվածում հանրապետությունում արտադրվել է 18 մլն 427.8 հազար լիտր կոնյակ:

Պաշտոնական վիճակագրության համաձայն՝  հանրապետությունում  այս տարվա ութ ամիսներին  2.3%-ով նվազել է գինու արտադրության ծավալը: Մասնավորապես, հունվար-օգոստոսին Հայաստանում արտադրվել է 4 990.6  հազար լիտր գինի՝ 2017 թվականի 5 110.1  հազարի դիմաց։

Նշված ժամանակահատվածում  հանրապետությունում արտադրվել է 2 մլն 347 հազար լիտր օղի, ինչը նախորդ տարվա հունվար-օգոստոսի համեմատ  նվազել է 35.2%-ով: Համեմատության համար նշենք, որ 2017թ-ի հունվար-օգոստոսին Հայաստանում արտադրվել է 3 մլն 624 հազար լիտր օղի:
Ինչ վերաբերում է վիսկիի արտադրությանը, ապա  վերոնշյալ ժամանակահատվածում Հայաստանում արտադրվել է 491.5 հազար լիտր վիսկի, իսկ նախորդ տարվա նույն ժամանակահատվածում՝  849.7 հազար լիտր: Վիսկիի արտադրություն այս տարի նվազել է 42.2%-ով:

Ըստ վիճակագրության՝ հունվար-օգոստոսին Հայաստանում արտադրվել է 318.9 հազար լիտր շամպայն գինի` 2017թ.-ի նույն ժամանակահատվածի համեմատ աճելով 4.6%-ով:

Ինչ վերաբերում է գարեջրի արտադրությանը, ապա նշված ժամանակահատվածում արտադրության ծավալներն ավելացել են 8.3%-ով և կազմել 17 մլն 53.7 հազար լիտր։