Ձեր վստահելի աղբյուրը

Միջազգային հակակոռուպցիոն Transparency International կազմակերպությունը (TI) անհրաժեշտ է համարում հետաքննություն սկսել Գերմանիայի Բունդեսթագի Քրիստոնեա-դեմոկրատական կուսակցության պատգամավոր  Կարին Շտրենցի նկատմամբ, ով կասկածվում է Ադրբեջանից կաշառք ստանալու մեջ։ Հետաքննության սկսման համար Բեռլինի դատախազությունից պահանջում են Շտրենցին զրկել պատգամավորական անձեռնմխելիությունից։

Ինչպես DW–ին ասել է Transparency International-ի կառավարման խորհրդի անդամ Վոլֆգանգ Վոդարգը, Եվրոպայի խորհրդի փորձագետների ուսումնասիրությունը բավական հիմք է տալիս Կարին Շտրենցի կողմից կոռուպցիայի կասկածի համար։

Հաղորդվում է, որ Բեռլինի դատախազությունը հետաքրքրվել է Շտրենցի գործով, սակայն պատգամավորի կոռուպցիոն գործունեության վերաբերյալ կասկածները հիմնավոր չի համարել, որ հետաքննություն սկսի։ Ինչպես DW-ին ասել է դատախազության ներկայացուցիչը, Շտրենցի նկատմամբ գործը դադարեցվել է դեռ նախաքննության փուլում։

Հիշեցնենք, որ «Ադրբեջանական լվացքատան»  բացահայտումների արդյունքում կաշառված քաղաքական գործիչների շարքում էր հայտնվել նաև 2009-ից բունդեսթագի պատգամավոր Կարին Շտրենցը, ով նաև Եվրոպայի խորհրդի խորհրդարանական վեհաժողովի անդամ է եղել:

Շտրենցը նվազագույնը 15 հազար եվրո էր ստացել Ադրբեջանի շահերը սպասարկող գերմանական լոբբիստական ընկերության կողմից, որը պատկանում էր  Քրիստոնեասոցիալական կուսակցությունից նախկին պատգամավոր Էդուարդ Լինթներին, ով 2009թ. ի վեր իր կողմից հիմնադրված «Գերմանա-ադրբեջանական հարաբերությունների խթանման ընկերություն»-ով  հանդես է գալիս որպես Ադրբեջանի լոբբիստ ու, ըստ բացահայտումների, Ալիևի ընտանիքի կողմից ստացել է ավելի քան 800 հազար եվրո։

Շտրենցի հետ կապված սկանդալից հետո նա չընդգրկվեց ԵԽԽՎ-ում Գերմանիայի պատվիրակության կազմում։