Ակնկալում ենք արդյունավետ առաջընթաց ՀՀ-ԵՄ համաձայնագրի ճանապարհային քարտեզի մշակման աշխատանքներում. եվրոպացի պաշտոնյա
Փոխվարչապետի պաշտոնակատար Մհեր Գրիգորյանն ընդունել է երկօրյա պաշտոնական այցով Հայաստանում գտնվող Եվրոպական արտաքին գործողությունների ծառայության (ԵԱԳԾ) Եվրոպայի և Կենտրոնական Ասիայի տնօրինության գործադիր տնօրեն Թոմաս Մայր-Հարթինգին: Այս մասին հայտնում են կառավարության լրատվական ծառայությունից։
Հանդիպմանը ներկա են եղել նաև Եվրոպական հանձնաժողովի Հարևանության և ընդլայնման բանակցությունների գլխավոր տնօրինության Հայաստանի հետ գործընկերության հարցերով բաժնի ղեկավար Վասիլիս Մարագոսը և Հայաստանում ԵՄ պատվիրակության ղեկավար, դեսպան Պյոտր Սվիտալսկին:
Ողջունելով հյուրերին՝ փոխվարչապետի պաշտոնակատարը կարևորել է ՀՀ-ԵՄ հարաբերությունների հետևողական զարգացման ուղղությամբ երկու կողմերի համատեղ ջանքերը և հույս հայտնել, որ Թոմաս Մայր-Հարթինգի այցը ևս մեկ խթան կհանդիսանա ՀՀ-ԵՄ հարաբերություններն ընդլայնելու և խորացնելու համար:
Մհեր Գրիգորյանն անդրադարձել է Հայաստան-Եվրամիություն համագործակցության օրակարգային հարցերին, խոսել ՀՀ-ԵՄ Համապարփակ և ընդլայնված գործընկերության համաձայնագրի և ՀՀ-ԵՄ Գործընկերության առաջնայնություններ փաստաթղթի կիրարկումն ապահովող միջոցառումները համակարգող միջգերատեսչական հանձնաժողովի աշխատանքների մասին:
«Որպես Հայաստանի առանցքային գործընկեր՝ Եվրոպական միությունը պատրաստակամ է աջակցելու ժողովրդավարական և տնտեսական բարեփոխումներին միտված Հայաստանի ջանքերին՝ ի շահ ՀՀ քաղաքացիների: Մենք ակնկալում ենք արդյունավետ առաջընթաց Համապարփակ և ընդլայնված գործընկերության համաձայնագրի ճանապարհային քարտեզի մշակման աշխատանքներում»,- հանդիպման ընթացքում նշել է ԵԱԳԾ Եվրոպայի և Կենտրոնական Ասիայի գծով գործադիր տնօրեն Թոմաս Մայր-Հարթինգը:
Զրուցակիցները մտքեր են փոխանակել Հայաստանում տարբեր ոլորտներում իրականացվող բարեփոխումների շուրջ՝ երկուստեք կարևորելով դրանց հետևողական իրականացումը երկրի կայուն զարգացման տեսանկյունից:
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
