Փոքր և միջին բիզնեսի վարկավորման երկու նոր առաջարկ՝ Ամերիաբանկի կողմից
Կարևորելով փոքր և միջին բիզնեսի զարգացումը՝ Ամերիաբանկը» ՓՄՁ-ների վարկավորման երկու արշավ է իրականացնում։ Այս մասին լրագրողների հետ հանդիպման ժամանակ տեղեկացրեց «Ամերիաբանկ»-ի մանրածախ գործառնությունների գծով տնօրեն Արման Բարսեղյանը:
Մասնավորապես, առաջինը վերաբերում է բիզնես վարկերի վերաֆինանսավորմանը։
«Կազմակերպությունները, բիզնեսները, որոնք այլ բանկերում ունեն վարկեր, կարող են վերաֆինանսավորվել և ավելի գրավիչ պայմաններով վարկերը տեղափոխել «Ամերիաբանկ»»,- նշեց Արման Բարսեղյանը՝ հավելելով, որ վարկը տեղափոխելու բոլոր ծախսերը հոգալու է բանկը:
Վարկի տեղափոխման դեպքում «Ամերիաբանկ»-ն իր հաճախորդներին կտրամադրի վերաֆինանսավորվող վարկի 2%-ի չափով միանվագ գումար։
«Վարկը տեղափոխելու համար սա խրախուսելի մեթոդ է: Կարծում ենք, որ փոքր և միջին բիզնեսի համար տարեվերջի այս բուռն շրջանում լուրջ աջակցություն կարող է լինել: Նաև առաջիկա 12 ամսվա ընթացքում վարկի մայր գումարի մարման մինչ 50%-ի նվազեցում ենք նախատեսում»,- ասաց Ա. Բարսեղյանը՝ հավելելով, որ կազմակերպություններն այս հնարավորություններից կարող են օգտվել մինչ տարեվերջ:
Նշվեց նաև, որ վարկերի վերաֆինանսավորումը «Ամերիաբանկ»-ը կառաջարկի իր մոտ գործող ստանդարտ տոկոսադրույքներով, իսկ ֆինանսավորման գումարը կարող է լինել մինչև գրավի արժեքի 100 տոկոսի չափով: Ակցիան տարածվում է 10-150 մլն դրամի վարկերի վրա:
«Ամերիաբանկ»-ի պաշտոնյան հայտնեց, որ երկրորդ առաջարկը նույնպես փոքր և միջին բիզնեսի համար է։ Այս արշավի շրջանակում բանկը կտրամադրի բիզնես վարկեր՝ տարեվերջի ընթացիկ ծախսերը ֆինանսավորելու համար:
«Գիտենք, որ նախաամանորյա ժամանակահատվածում բոլոր բիզնեսները կամ դրանց գերակշիռ մասը լրացուցիչ միջոցների կարիք են ունենում: Այս արշավը նախաձեռնել ենք՝ այդ տրամաբանությունից ելնելով, մասնավորապես, բիզնեսներին առաջարկում ենք կարճաժամկետ ֆինանսավորում՝ բավականին գրավիչ տոկոսադրույքներով»,- հայտնեց Արման Բարսեղյանը։
Նրա խոսքով՝ այս արշավը ևս ուժի մեջ է մինչև տարեվերջ, դրա շրջանակում ստացված վարկերը մինչև մյուս տարվա մարտի 1-ն ունենալու են «չափազանց գրավիչ» տոկոսադրույք, քանի որ կարճաժամկետ ժամանակահատվածի համար են նախատեսված և նպատակ ունեն ֆինանսավորելու բիզնեսի տարեվերջյան կարիքները։
Այսպիսով, արշավի շրջանակում դրամային վարկերի դեպքում մինչև 2019թ. մարտի 1-ը կիրառվելու է 9,44%, դոլարայինի դեպքում՝ 6,94%, իսկ եվրոյով վարկերի դեպքում՝ 5,3% տոկոսադրույք: Եթե մինչև մարտի 1-ը վարկն ամբողջությամբ մարվի, արտոնյալ տոկոսադրույքը կիրառվի ամբողջ ժամանակահատվածի համար, իսկ եթե հաճախորդը որոշի շարունակել վարկի սպասարկումը, մնացած ժամանակահատվածի համար կգործեն բանկի ստանդարտ, մրցակցային տոկոսադրույքները։
Արման Բարսեղյանը ներկայացրեց նաև ֆիզիկական անձանց համար «Ամերիաբանկի» առաջարկները: Նրա խոսքով՝ գնումների ֆինանսավորման ծառայությունների՝ ինչպես տարածված է անվանել, ապառիկ վարկերի առումով բանկը ևս ունի նորություն: «Սկսել ենք ակտիվորեն ֆինանսավորել արևային կայանների գնումները: Հուսով ենք, որ այս նոր ուղղությունն ակտիվ զարգանալու է»,- նշեց նա։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
