Ձեր վստահելի աղբյուրը

«Եվրատեսիլ 2019»-ի եվրոպացի կազմակերպիչները որոշակի ճնշման տակ են եղել ծայրահեղ կրոնական շրջանակների կողմից, որոնք հայտարարում էին, թե թույլ չեն տա մրցույթի բացումը և անգամ փորձի անցկացումը շաբաթ օրը: Ռիա նովոստիի հաղորդմամբ,  հայտարարել է Թել-Ավիվի քաղաքապետ Ռոն Հուլդաին:

Լիսաբոնում, Եվրատեսիլ-2018-ին իսրայելցի Նեթա Բարզիլայի հաղթանակից անմիջապես հետո, վարչապետ Բենյամին Նեթանյահուն հայտարարել էր, որ մրցույթը հաջորդ տարի կանցկացվի Երուսաղեմում: Սակայն ծայրահեղ ուղղափառ համայնքների կտրուկ դեմ արտահայտություններից հետո, կառավարությունը հրաժարվել է սկզբնական գաղափարից: Իսկ մրցույթի եվրոպական կազմակերպիչները ստիպված էին այլ վայր փնտրել մրցույթն անցկացնելու համար: Հուլդաիի խոսքով,  ընտրությունը կատարվել է հօգուտ Թել-Ավիվի, քանի որ այն արվեստի ու բարի հարաբերությունների համար բաց, բազմամշակութային կենտրոն է:

«Թել-Ավիվն ամբողջական իմաստով ազատ քաղաք է, որն ընդունում է բոլորին, այդ թվում ոչ ավանդական սեռական կողմնորոշմամբ մարդկանց»,- ընդգծել է քաղաքապետը:

Հուլդաին նկատել է, որ վերջին տարիներին էապես աճել է տուրիստների հոսքը Թել-Ավիվ, որն, ի թիվս պատմական տեսարժան վայրերի, հայտնի է խոհանոցով և վառ գիշերային կյանքով: Քաղաքապետը նաև պատրաստակամություն է հայտնել փորձերի ու Եվրատեսիլի անցկացման համար անվճար դահլիճներ տրամադրել:

Մրցույթի եզրափակիչը կայանալու է մայիսի 18-ին Գանեյ-Տաարուհա ցուցահանդեսային համալիրի տաղավարում, որը տեղավորում է 9 հազար մարդ: