Ձեր վստահելի աղբյուրը

Երևանի քաղաքապետ  Հայկ Մարությանը շնորհավորական ուղերձը է հղել «Էրեբունի-Երևանի հիմնադրման 2800-ամյակի առթիվ, բոլորին սեր խոստովանել ու բարձր տրամադրություն մաղթել:

«Սա ոչ միայն Երևանի բնակիչների, այլև բոլոր այն մարդկանց տոնն է, ովքեր սիրում են Երևանը և այն համարում իրենց հարազատ վայրը: Չէ որ  Երևանն ամբողջ հայության մայրաքաղաքն է: Ցանկանում եմ, որ մեր Երևանը, չնայած իր պատկառելի տարիքին, լինի միշտ երիտասարդ և ուժերով լի քաղաք: Այս օրերին շնորհավորանքներ եմ ստանում աշխարհի բազմաթիվ անկյուններից, շնորհավորում են ձեզ, սիրելի երևանցիներ»,-մասնավորապես ասված է քաղաքապետի ուղերձում: 

Մարությանն ուղերձում թվարկել է այսօր սպասվող միջոցառումները. «Ուզում եմ հատկանշել, որ այսօր վաղ առավոտյան սկսվում են մեր տոնական միջոցառումները, Երևանի տարբեր հատվածներում լինելու են տարաբնույթ հանդիսություններ, նորաձևության  ցուցադրություն, թեմատիկ բեմեր, հեծանվավազք, ի դեպ, որի մեկնարկին մասնակցելու եմ նաև  ես: Ամբողջ օրը շրջելու եմ մայրաքաղաքում, հանդիպելու եմ ձեզ, շնորհավորելու ենք միմյանց  ու  միասին տոնելու ենք մեր քաղաքի  հոբելյանը: Համոզված եմ, որ անչափ հիշարժան ու հագեցած օր ենք անցկացնելու: Երեկոյան՝ 19: 30-ին Հանրապետության հրապարակում կմեկնարկի գլխավոր միջոցառումը՝  տոնական  գալահամերգը, որը, հուսով եմ, դրական լիցքեր ու հաճելի ակնթարթներ կպարգևի ձեզ»:

Նա նաև նշել է, տոնական երեկոն հագեցած կլինի օրվա խորհրդով ընտրված երևանյան  երաժշտությամբ, նաև պատմական անդրադարձով, Երևանի  կենսագրությանը և մեր օրերի մայրաքաղաքը ներկայացնող բեմականացումներով, իսկ ավարտին՝ հրավառություն: