Ձեր վստահելի աղբյուրը

«Վենետիկյան հանձնաժողովի նախագահի հայտարարությունը շատ պարզ և լավ անգլերենով գովում է ընթացիկ բարեփոխումների քաղաքական կամքը, մինչ այդ եղած մանր և միջին խնդիրների լուծման փորձը, բայց վերջում տալիս է հստակ քաղաքական գնահատականն առ այն, որ ընտրություններին այդքան մոտ ժամկետներում հիմնարար փոփոխություններ չի կարելի անել։ Սա նշանակում է, որ նախկինում թվարկված բոլոր փոփոխությունները էական չեն»,- լրագրողների հետ զրույցում այսօր ԱԺ-ում ասաց ՀՀԿ խմբակցության պատգամավոր Արմեն Աշոտյանը։

«Վենետիկի հանձնաժողովի նախագահն ասում է՝ փոքր և միջին փոփոխություններն օքեյ են, բայց խոշոր փոփոխություններ չեն կարող արվել ընտրություններից մեկ տարի առաջ։ Այդ դժգոհությունը կամ վերապահումը կարող է մեղմվել, եթե քաղաքական կոնսենսուս լինի, որովհետև այդ դիրքորոշումը ոչ թե Մելիք Ադամյան 2-ից բերված դիրքորոշում է, այլ Եվրոպայի խորհրդի ժողովրդավարական լավագույն ավանդույթներ ունեցող կառույցի դիրքորոշումը, այսինքն՝ խնդիրն այն չէ, որ Վենետիկի հանձնաժողովի նախագահը հատուկ ՀՀԿ-ի համար լուրջ կռվան է թողել։ Կան սկզբունքներ, և այդ սկզբունքների վրա թավշյա հեղափոխությունը չի ազդում։ Դրանք չեն կարող փոխվել ՀՀ վարչապետի կամքով, ԱԺ-ն պաշարելով՝ ինչքան ուզում եք՝ ասեք՝ կա քաղաքական ճգնաժամ»,- շեշտեց հանրապետական պատգամավորը։

Նրա խոսքով, եթե ներկա իշխանությունները չեն կարողանում ստույգ որոշում կայացնել՝ ընտրություննե՞ր, թե փոփոխված Ընտրական օրենսգիրք։ Աշոտյանի համոզմամբ, եթե անգամ ԸՕ-ն ընդունվի, ընդունվելու է առանց քաղաքական կոնսենսուսի, ինչն էլ կհակասի ժողովրդավարության դասական կանոններին։

«Կան ժողովրդավարության կանոններ, և ոչ մի թավշյա հեղափոխություն չի կարող փոխել դասական եվրոպական ժողովրդավարության կանոնը՝ ինչքան Արարտ Միրզոյանը գնա Վենետիկ, ինչքան Նիկոլ Փաշինյանը լայվ մտնի, ինչքան մարդ բերեն պատուհանի տակ՝ ինձ հիշատակեն. չի փոխվելու, հետևաբար եթե ուզում ենք ժողովրդավարություն անել, ժողովրդավարություն կառուցել հակաժողովրդավարական կաննոներով ուղղակի աբսուրդ է։

ԸՕ-ի փոփոխությունն ինքնանպատակ չէ, նպատակն այն է, որ լիներ ավելի ժողովրդավար վիճակ, բայց այս ձևո՞վ։ Կներեք, մարդիկ տանը կոմպոտ «զակատ անելու» համար ավելի երկար են պատրաստվում, քան այստեղ 24 ժամում երկրորդ ընթերցմամբ ուզում են ԸՕ անցկացնել։ Լավ, քվեարկեցիք, ևս մի տասնհինգ պատգամավորի համոզեցիք, ճնշեցիք, քվեարկեցին, բա հետո՞»,- նշեց Արմեն Աշոտյանը՝ հավաստիացնելով, որ իրենց իշխանության օրոք երբեք մեկ օրում սահմանադրական օրենքի լրջագույն փոփոխություն չի կատարվել։

ՀՀԿ խմբակցության պատգամավորը չհստակեցրեց՝ արդյոք ՀՀԿ-ն մասնակցելու է արտահերթ ընտրություններին, թե ոչ՝ հորդորելով սպասել պատեհ պահին։

«Սա ժամանակից առաջ ընկնող հարց է։ Թողեք՝ տեսնենք ԸՕ-ի շուրջ քննարկումներն ինչպես են ընթանում։ Ոչ մի կուսակցություն դեռևս իր ցուցակը չի հրապարակել, ինչո՞ւ ՀՀԿ-ն պետք է դա առաջինն անի»,- հարց ուղղեց նա։

Ինչ վերաբերում է ՀՀԿ-ական այն պատգամավորներին, որոնք խմբակցության տեսակետից տարբերվող տեսակետեր են հայտնում և հեռանում, Աշոտյանը նշեց, որ ինքը ցավ է ապրում, նրանցից ոմանց շարունակում է ընկեր համարել, սակայն ԱԺ-ում իրադարձությունները շատ արագ են ծավալվում։