Ձեր վստահելի աղբյուրը

«Մեզ համար անընդունելի է այն, ինչը փորձ է արվում պարտադրանքով իրականացնել, իսկ արտահերթ խորհրդարանական ընտրությունները դեկտեմբերին անցկացնելը ըստ էության պարտադրանք է։ Մենք ինքներս ենք ստեղծել այս ֆորս-մաժորը, ճգնաժամը և ուզում ենք հերոսաբար հաղթահարել այն»,- լրագրողների հետ զրույցում այսօր ասաց ՀՅԴ խմբակցության ղեկավար Արմեն Ռուստամյանը։

«Դեկտեմբերին ընտրությունների անցկացման պարագայում երկու պրոբլեմ է առաջանում։ Մենք ստիպված ենք լինում ընտրություն կատարել վատի և ոչ լավի միջև։ Եթե մենք չենք ընդունում այս օրենսգիրքը, մնում է հինը, որը վատ է։ Եթե ընդունում ենք նոր Ընտրական օրենսգիրքը, չի կարող լավ համարվել մի ընտրություն, որն անցկացվում է նոր օրենսգիրքն ուժի մեջ մտնելուց մեկ ամիս հետո։

Մենք միշտ կողմ ենք քվեարկել այն նախագծերին, որոնք առաջընթաց են ապահովել։ Իսկ քանի որ առաջընթաց տեսնում ենք, փոփոխությունների ուղղությունը ճիշտ է, մենք չենք կարող դեմ լինել։ Բնականաբար, կողմ ենք, այդտեղ դրական տեղաշարժեր կան»,- ասաց Ռուստամյանը։

Դաշնակցական գործիչը նկատեց՝ Ընտրական օրենսգրքի՝ մի քանի ժամվա ընթացքում երկու ընթերցում անցկացնելը շատ սխալ պրակտիկա է։ Նա շեշտեց՝ արտահերթ ընտրությունները դեկտեմբեր ամսին անցկացնելը դարձել է ինքնանպատակ։

«Քայլեր կան, որոնք պարզապես չեն արվել։ Ամեն ինչ հարամարցված է  դեկտեմբերին։ Անգամ հանվել է հանձնաժողովների մասնագիտական ուսուցման հարցը։ Չեմ բացառում, որ նախագիծն այսօր չընունվի, ես երբեք ոչինչ ԱԺ-ում չեմ բացառել»,- ասաց Արմեն Ռուստամյանը։

Հարցին՝ սաբոտաժ համարո՞ւմ է ՀՀԿ-ի դիրքորոշումը, որը կողմ չի քվեարկելու ԸՕ նախագծին,  դաշնակցական գործիչը պատասխանեց՝ ի՞նչ է նշանակում սաբոտաժ, նրանք սեփական տեսակետն են արտահայտում, դա նրանց իրավունքն է։

«Իհարկե, այս Ընտրական օրենսգիրքը փոխելուց հետո պետք է ժամանակ հատկացվի, որպեսզի պատրաստվեն։ Մրցակցային պայմաններ են խախտվելու, և իսկապես ական է դրվելու այդ ընտրությունների տակ։ Սա ձեռնտու չէ այն իշխանությունը, որ վստահություն  ունի՝ միևնույն է մեծամասնություն է ունենալու։ Ինչի՞ է պետք ակնաապատ դաշտով այդ մեծամասնությունը ստանալ, չեմ հասկանում»,- ասաց նա։

Ճշգրտող հարցին՝ ՀՅԴ-ն ԸՕ նախագծին և կողմ է և դե՞մ, Արմեն Ռուստամյանը հստակեցրեց՝ իրենք և կողմ են, և դեմ, կողմ են լույսին, դեմ են խավարին։

«Անխուսափելի իրավիճակ է, հո երկրից չենք թողնելու, գնանք։ Ընտրությունն այս ձևով են անում, այս ձևով կմասնակցենք»,- նշեց ՀՅԴ խմբակցության պատգամավորը։

Անդրադառնալով ԸՕ նախագծի վերաբերյալ Վենետիկի հանձնաժողովի նախագահի հայտարարությանը՝ Արմեն Ռուստամյանը նշեց՝ կառույցը պահպանել է իր տեսակետը՝ գնդակը նետելով քաղաքական ուժերի դաշտը։

Խոսելով Նիկոլ Փաշինյանի՝ բարիկադները քանդելու մասին վերջին հայտնի հայտարարության մասին՝ Արմեն Ռուստամյանը նշեց՝ իրենք միշտ էլ կողմ են եղել դրանք քանդելուն։ Բացի այդ՝ նա նկատեց՝ եթե փաստում ենք, որ կան բարիկադներ, նշանակում է՝ սեր և համերաշխություն այդքան էլ չի եղել, այդ երևույթները տոտալ բնույթ չեն կրել։

Դաշնակցական գործիչը միաժամանակ հավաստիացրեց, որ կառավարությունից նոր պաշտոններ չեն ուզելու, հենց սկզբից էլ չեն ուզել։

«Սկզբից էլ հայտարարել ենք, որ Փաշինյանին պաշտպանելը չի նշանակում, որ անպայման ուզում ենք կառավարության մեջ լինել»,- շեշտեց նա։

Ինչ վերաբերում է ՏԻՄ ընտրություններին՝ Ռուստամյանի խոսքով, դրանք բավական պասիվ մասնակցություն է եղել, ինչը մտորելու տեղիք է տալիս։

«Շատ լավ է, որ մարդիկ հասկանում են՝ լցոնումներն ու նկարչությունը մնացել են անցյալում»,- ասաց ՀՅԴ խմբակցության ղեկավարը։