Ձեր վստահելի աղբյուրը

«Ինձ ՀՀ նախագահն է ներկայացրել։ Բայց, իսկապես, չեմ կարող ասել՝ ինչ կլինի ընտրության արդյունքը»,- ԱԺ-ում լրագրողների հետ զրույցում ասաց ՍԴ անդամի թեկնածու Վահե Գրիգորյանը՝ պատասխանելով այն հարցին, թե իշխանության թեկնածու լինելով՝ ինչպիսի վերաբերմունք է ակնկալում ընդդիմությունից։

«Ամենակարևորը, որ կարող եմ ասել՝ ցանկացած դատավորի ընտրության համար դուք չեք կարող կանխատեսել՝ ինչպիսին կարող է լինել ընտրությունը, որովհետև ամեն մեկը որոշելու է իր համար լավագույն ընտրությունը»,- ասաց նա։

Ինչ վերաբերում է նախկին իշխանության ներկայացուցիչ հանդիսացող ՍԴ նախագահ Հրայր Թովմասյանի հետ աշխատելու հեռանկարին, Գրիգորյանը նշեց, որ որևէ խնդիր այդ առումով չի տեսնում:

«Կաշխատեմ, ինչպես, որ հարկ եղավ: Սա անձնական նախապատվությունների հարց չէ: Ամեն մեկն ունի իր պաշտոնական պարտականությունները և այդ պարտականությունների շրջանակներում պարտավոր է համագործակցել, աշխատել, հարաբերվել ցանկացած մեկի հետ»:

Հարցին էլ՝ իր ընտրությունը քաղաքակա՞ն, թե՞ իրավական հարթությունում է, Վահե Գրիգորյանը պատասխանեց, որ սա ամեն դեպքում քաղաքական գործընթաց է:

ՍԴ դատավորի թեկնածուն չհերքեց, որ վայելում է գործադիր իշխանության վստահությունը՝ հնարավոր համարելով, որ այս հանգամանքը հաշվի առնելով՝ ընդդիմությունն իրեն ձայն չտա:

«Ընտրության արդյունքն ինձ համար բացարձակապես կանխատեսելի չէ»,- ասաց նա։