Ձեր վստահելի աղբյուրը

Այսօր մեկնարկած Ազգային ժողովի հերթական նիստում «Ելք» խմբակցության ղեկավար Լենա Նազարյանը պաշտոնապես ներկայացրեց վարչապետի ընտրություններում առաջադրված իրենց թեկնածուին՝ Նիկոլ Փաշինյանին։

«Այս ամենն արվում է, որպեսզի ապահովվի Սահմանդրությամբ պահանջվող ընթացակարգը։ Թեկնածուի գործունեությունը ներկայացնելու անհրաժեշտություն չեմ տեսնում, քանի որ այն բոլորին քաջ ծանոթ է», - ԱԺ ամբիոնից հայտարարեց Լենա Նազարյանը։

Այնուհետև ելույթ ունեցավ վարչապետի թեկնածու Նիկոլ Փաշինյանը։

«Այսօրվա իմ առաջադրումը, որպես վարչապետի թեկնածու, կրում է ֆորմալ բնույթ, և ես առաջադրվել եմ ոչ թե ընտրվելու, այլ՝ չընտրվելու համար, հետևաբար, այսօր ԱԺ-ն չպետք է քվեարկի իմ օգտին։ Առաջադրման իմաստը առաջիկա խորհրդարանական ընտրությունների լեգիտիմության շուրջ որևէ  շահարկումների հնարավորություն չթողնելն է, դրա համար իրավական սողանցքները բացառելն է։ Միանշանակ է ու աներկբա, որ առաջիկա դեկտեմբերին ունենալու ենք արտահերթ խորհրդարանական ընտրություններ, որոնք պետք է դառնան ապրիլ-մայիս ամիսներին տեղի ունեցած հեղափոխության վերջնական հաղթանակը», - իր ելույթի սկզբում հայտարարեց Փաշինյանը։

Նա նշեց, որ այսօր ներկայացնելու է վերջին հինգ ամիսների ընթացքում Հայաստանում ստեղծված քաղաքական իրավիճակը։

Փաշինյանն անդրադարձավ հարցին, թե այս ամիսների ընթացքում ինչ էր Հայաստանում տեղի ունեցածը, հեղափոխությու՞ն, թե պարզապես իշխանափոխություն։

«Ինձ հանար միանշանակ է և աներկբա, որ Հայաստանում տեղի է ունեցել հեղափոխություն, քանի որ տեղի է ունեցել հասարակական ֆորմացիայի իրական փոփոխություն։ Այս թեման հրատապ է այնքանով, որ կան քաղաքական գործիչներ, վերլուծաբաններ, ովքեր հայտարարում են և պնդում, թե Հայաստանում ընդամենն իշխանափոխություն է տեղի ունեցել, և ոչ թե հեղափոխություն։ Ճշմարտությունն իրականում հակառակն է, Հայաստանում հեղափոխություն է տեղի ունեցել, սակայն իշխանափոխություն դեռևս տեղի չի ունեցել, համենայն դեպս, ամբողջական իշխանափոխություն»,- ասաց նա։

Նա հիշեցրեց, որ իր՝ վարչապետ ընտրվելուց հետո, Հայաստանում տասնյակ քրեական գործեր են հարուցվել չարաշահումների, կաշառքների, յուրացումների մեղադրանքով. «Ես տվյալ պահին նկատի չունեմ այն գործերը, որոնք հարուցվել են ապրիլ-մայիսից առաջ տեղի ունեցած դեպքերի կապակցությամբ, ես խոսում եմ այն արարքների մասին, որոնք տեղի են ունեցել հեղափոխությունից հետո, իմ՝ վարչապետ ընտրվելուց հետո։ Ինձ համար երկար ժամանակ հասկանալի չէր, թե ինչպես կարող է 2018 թվականի ապրիլ-մայիսից հետո որևէ պաշտոնյայի մտքով անցնի կաշառք վերցնել, յուրացումներ անել, ընդ որում հեղափոխությունից ամիսներ, նույնիսկ օրեր անց։ Պատկերացնու՞մ եք, հեղափոխությունից 15-20 օր անց կա պաշտոնյա, որ կաշառք է վերցնում։ Պատասխանը մեկն է՝ կոնկրետ այս դահլիճից, և նախկին խորհրդարանական մեծամասնություն հանդիսացող քաղաքական ուժից   հին համակարգին ազդակներ են փոխանցվել և փոխանցվում, թե այս ամենն ընդամենը մի քանի ամսվա հեռանկար ունի, թե այս ամենը շուտով հետ է պտտվելու և հին համակարգը վերադառնալու է»։

Նրա խոսքով՝ այս ամենն արվում է՝ գործող կառավարության համար խոչընդոտներ ստեղծելու, և սպասել հարմար պահի՝ ռևանշի հասնելու համար, ընդ որում, մինչև երեկ, նման փորձեր եղել են։

«Առաջինը Ռոբերտ Քոչարյանի շուրջ կոնսոլիդացիա իրականացնելու փորձն էր, որը սակայն ձախողվեց, հիմնական քաղաքական գործոնի՝ ժողովրդի միանշանակ և հուժկու մերժման պատճառով։ Երկրորդ փորձը հոկտեմբերի 2-ին ԱԺ-ում տեղի ունեցածն էր՝ ԱԺ կանոնակարգ օրենքում փոփոխությունների հետ կապված։ Ռևանշի հասնելու երրորդ քայլը այս երկուշաբթի օրը ԱԺ-ում տեղի ունեցածն էր, երբ ՀՀԿ-ն բոյկոտեց և տապալեց ԸՕ-ում առաջադրվող փոփոխությունները։ Սա արվում էր նրա համար, որ առաջիկա արտահերթ խորհրդարանական ընտրությունները տեղի ունենան գործող ընտրական օրենսգրքով, այսինքն՝ ռեյտինգային ընտրակարգով, որովհետև Հանրապետական կուսակցության ներկայացուցիչների և նրանց հետ ասոցացվող ուժերի և անձանց շրջանում հանկարծակի հույս ծագեց, թե ռեյտինգային ընտրակարգը նրանց կարող է շանս տալ առաջիկա արտահերթ ընտրություններին հասնել ռևանշի: Իսկ պատճառը պետք է ուղիղ կապել Կապանում տեղի ունեցած քաղաքապետի ընտրությունների հետ», -ասաց Փաշինյանը։

Նրա խոսքով՝ Սյունիքի գործող քրեական, քաղաքական և տնտեսական էլիտան, իր ձեռքում շարունակելով պահել բավականին շոշափելի լծակներ, կարողացել է կոնսոլիդացիա ապահովել և մարդկանց մի որոշակի հատվածի, հին մշակույթի և արժեքների տրամաբանությամբ ուղղորդել որոշակի քվեարկության. «Հանրապետականները հույս ունեն, որ առաջիկա խորհրդարանական ընտրություններում կհաջողվի գործարկել կապանյան մոդելը»։

Ինչ վերաբերում է Հունան Պողոսյանին Սյունիքի մարզպետ նշանակելուն, նա ասաց, որ մարզում արդեն նշած խնդիրները կարող է լուծել միայն ու միայն կառավարման մեծ փորձ, կառավարման հին համակարգի բոլոր մանրամասներին ու նրբություններին ծանոթ այնպիսի մի մարզպետ, ով կկարողանա չեզոքացնել նաև իրավապահ համակարգի նկատմամբ հին տնտեսական և քրեական էլիտայի ազդեցությունը։

«Սա այն դեպքն է, երբ սեպը սեպով պիտի է հանես»,- ասաց վարչապետի թեկնածուն։

Անդրադառնալով Կապանի քաղաքապետի ընտրություններին, որի արդյունքներով «Քաղաքացիական պայմանագիր» կուսակցության թեկնածու Նարեկ Բաբայանը չէր հաղթել, Փաշինյանը հայտարարեց, որ իրենք ընդունել են այդ ընտրությունների արդյունքները։ Իսկ այդ արդյունքներն իրենք ընդունել են, քանի որ իրենց նպատակն է ժողովրդի իշխանության հաստատումը։

«Սակայն Կապանում ընտրությունների արդյունքների վրա անառողջ ազդեցություն են ունեցել քաղաքական ու տնտեսական էլիտան, որի պատճառն այն է, որ այնտեղ հեղափոխությունը ոչ բոլորին է հասել»,- հավելեց Փաշինյանը։

Փաշինյանը խոսեց նաև նոր պաշտոններ ստացողներից՝ նշելով. «Իսկ ո՞վ է ասում, որ նրանք, ովքեր նոր են միայն պաշտոն ստանձնում, հրեշտակներ են։ Այս ընթացքում անտանելի հիասթափություններ ու սթրեսներ եմ ապրել, երբ եղել են մարդիկ, ովքեր, հանդես գալով որպես հեղափոխության ամենաջերմեռանդ պաշտպան, ամենասկզբունքայինը, մի շաբաթվա, մի ամսվա մեջ քանդուքար են եղել։ Ես չեմ կարող այս մասին չասել, որովհետև դա անազնիվ կլինի մեր ժողովրդի առաջ, անազնիվ կլինի առաջին հերթին մեր առաջ։ Մենք իրավունք չունենք որևէ ընկերական, ազգակցական, ընտանեկան կապ ավելի բարձր գնահատել, քան այն արժեքները, որ ստեղծել ենք, դա կլինի ուղիղ դավաճանություն՝ պետության ու ժողովրդի նկատմամբ»։