Ձեր վստահելի աղբյուրը

Այսօր Հայ օգնության ֆոնդը (ՀՕՖ) Երեխաների թերսնուցման և դրա հետևանքով առաջացող զարգացման խնդիրները թեմայով համաժողով է կազմակերպել Տավուշի մարզի Իջևան քաղաքում։ Այս մասին հայտնում են ՀՕՖ մամուլի ծառայությունից։

Երեխաների թերսնուցման և դրա հետևանքով առաջացող զարգացման խնդիրները կազմակերպության ուշադրության կենտրոնում են 2011թվականից։ 2013 թվականին, մեկնարկելով Աղքատության հաղթահարումը Տավուշի մարզում (ԱՀՏՄ) բազմաբաղադրիչ ծրագիրը, ՀՕՖ-ը դրա բաղադրիչներից մեկն ուղղել է նախադպրոցական տարիքի երեխաների սնուցման և առողջության բարելավմանը՝ թիրախ ընտրելով Տավուշի մարզի Բերդ քաղաքն ու հարակից 14 գյուղական համայնքները:

Համաժողովին ներկայացվել է, թե որքանով է կարևոր երեխաների սնուցումը որևէ երկրի տնտեսության զարգացման ու հանրային առողջապահության համար, փորձագետները խոսել են Հայաստանի ու միջազգային փորձի մասին, դիտարկել առկա իրավիճակը, ՀՕՖ-ի ներկայացուցիչները ներկայացրել են ԱՀՏՄ-ի արձանագրած հաջողություններն ու հաղթահարած և առաջիկա մարտահրավերները, ծրագրի հեռանկարները։

ՀՕՖ-ի առողջապահական և սոցիալական հարցերի պատասխանատու Վահե Քրմոյանը ներկայացրել է, որ ԱՀՏՄ ծրագրի առողջապահական ծրագրի շրջանակներում հիմնովին կամ մասնակի վերանորոգվել է Բերդի տարածաշրջանի 7 մանկապարտեզ, վերնորոգվել ու վերազինվել է 5 մայրական սենյակ,  բալանսավորված սննդի տրամադրման ծրագրում ընդգրկված է 16  մանկապարտեզ։

ՀՕՖ-ի Առողջապահական ծրագրերի ղեկավար Համբարձում Սիմոնյանը տեղեկացրել է, որ ծրագիրը շարունակվելու է ևս հինգ տարի ու ընդգրկելու է Բերդի տարածաշրջանից դուրս գտնվող գյուղեր։
Սնուցման կարևոր հարցերի վերաբերյալ ելույթ են ունեցել Նյու Յորքի Կոլումբիայի համալսարանի Մարդու սնուցման ինստիտուտի պրոֆեսոր Կիմ Հեքիմիանն ու Մուրացան համալսարանական մանկական կլինիկայի մանկաբույժ, «Վստահություն» ՀԿ-ի ներկայացուցիչ Սուսաննա Հարությունյանը։