Ձեր վստահելի աղբյուրը

Հունգարիան չի կարող լուռ մնալ 2019թ.-ի մայիսին կայանալիք Եվրոպական խորհրդարանի ընտրություններում։ Այս մասին ասել է Հունգարիայի  վարչապետ Վիկտոր Օրբանը, ելույթ ունենալով Բուդապեշտում հավաքի ժամանակ, որը նվիրված էր 1956թ.-ին Հունգարիայի՝ ընդդեմ սովետական իշխանության հեղափոխությանը։ Գրում է Politico-ն։

«Եվրոպայում բոլորը մտածում են մայիսի մասին։ Այդ ընտրությունները կորոշեն, թե ուր է գնում Եվրոպան»,-ասել է Օրբանն ու Բրյուսելին մեղադրել ազգային պետությունների դերը նվազեցնելու ու Եվրոպական կայսրություն կառուցելու մեջ, որը պետք է կառավարվի ոչ թե  ժողովուրդների ընտրած ղեկավարների, այլ Բրյուսելի բյուրոկրատների կողմից։

Օրբանը նշել է, որ Եվրոպան ազգերի մայրցամաք է ու զգուշացրել է «խառը» հասարակության վտանգների մասին։

Օրբանն ասել է, որ միգրացիան դանդաղ, բայց անխուսափելիորեն հանգեցնում նրան, որ Եվրոպայի բնիկ ժողովուրդները դառնալու են փոքրամասնություն։

«Եկեք մերժենք գլոբալիզացիայի գաղափարախոսությունը»,-ասել է Օրբանը։

Նշենք, որ 2019թ.-ի ընտրությունները որոշիչ են լինելու Եվրոպայի ապագայի համար։ Մտահոգություններ կան, որ այս ընտրություններում կարող են շատ ձայներ ստանալ ազգայնականներն ու պոպուլիսները, որը կարող է վտանգավոր լինել Եվրոպական միության համար։