Ձեր վստահելի աղբյուրը

«Ամեն ինչ կախված է մեր աշխատանքի արտադրողականությունից։ Եթե մենք կարողանանք երեք-չորս անգամ արագ աշխատել, կհասցնենք։ Ես ամեն օր տեղեկատվություն եմ ստանում համապատասխան մարմիններից»,-ԱԺ-ում լրագրողների հետ ճեպազրույցում այսօր ասաց Գազի և էլեկտրաէներգիայի հարցով ԱԺ քննիչ հանձնաժողովի նախագահ Միքայել Մելքումյանը՝ պատասխանելով այն հարցին, թե փոքր ժամանակահատվածում իրենք որքանո՞վ արդյունավետ աշխատանքներ կարող են ծավալել գազի սակագնի քննարկումների շուրջ։

«Երկու օր առաջ ԱԺ-ում ես հարց ուղղեցի վարչապետի պաշտոնակատարին։ Հարց հնչեց, որ ՌԴ նախագահը հետաքրքրություն է ցուցաբերում, և իրենք պայմանավորվածություն ունեն, որ մենք փաստաթղթավորված կգնանք ներկայացնելու՝ ոնց է ստացվում, որ սահմանից մինչև վերջնական սպառում գազը երկու անգամ թանկանում է։ Եվ եթե մենք հիմնավորումներ ներկայացնենք, հարցը քննարկման առարկա կդառնա։

Ուշադրություն դարձնենք 2013 թվականի դեկտեմբերին ԱԺ-ի կողմից վավերացված, Հայաստանի և Ռուսաստանի միջև գազային ստորացուցիչ պայմանագրին։ Այն ստորացուցիչ կետեր է պարունակում, որոնցից մեկն այն է, որ առաջիկա քսան տարիների համար մենք պետք է «Գազպրոմի» համար համապատասխան շահութաբերություն ապահովեինք։ Սա պետք է վերանայվի»,- շեշտեց Միքայել Մելքումյանը։

ԱԺ հանձնաժողովի նախագահը համոզմունք հայտնեց, որ Հայաստանը պետք է այնպիսի պայմաններ ունենա, որոնք կկարողանան նպաստել ռուսական գազի սակագնի իջեցմանը։

«Գազի սակագինը ժամանակին 189 դոլարից իջավ 165 դոլարի։ Այդ 24 դոլարի իջեցումը խնայում էր 9,6 միլիարդ դրամ։ Դա մնացել է«Գազպրոմ Արմենիային», թույլ չի տալիս, որ սակագինն իջնի։ 165-ից 150 որ իջել է, թույլ է տվել, որ 7 դրամ իջեցնենք։ Իրականում պետք է 9  դրամ իջներ, սակայն իջել է յոթ դրամ, քանի որ այդ երկու դրամը գնացել է ջերմոցներին և սոցիալական խավերին»,- ասաց Մելքումյանը։

Պատգամավորը ուշադրություն հրավիրեց այն հանգամանքի վրա, որ գազի հարցերով կառավարական աշխատանքային խմբի ղեկավար Ֆելիքս Թադևոսյանի հետ հեռախոսազրուց է ունեցել, զրույց պետք է ունենա նաև փոխվարչապետի ժամանակավոր պաշտոնակատար Մհեր Գրիգորյանի հետ։

«Ամեն ինչ անելու ենք, որ մինչև նոյեմբերի վերջ կարողանանք փաստարկված հարցադրումներ ունենալ»,- նշեց նա։

Վերջում Միքայել Մելքումյանը հայտնեց, որ Գազի և էլեկտրաէներգիայի հարցով ԱԺ քննիչ հանձնաժողովը երկու փակ նիստ կունենա, որոնց ժամանակ կքննարկվեն գազատարի ռիսկային տեղաբաշխումների հետ կապված հարցեր։ Այլ մանրամասներ նա չհայտնեց։